Read KITAB SUCI ZABUR INJIL ZABUR 118 Bible Online

ZABUR 118 - KITAB SUCI ZABUR INJIL bible

ZABUR 118

¹ Pade besyukur tipaq ALLAH séngaq Ie solah, kasih-Ne kekel selaéq-laéqne.

²Menengang dengan Israel bebase, “Kasih-Ne kekel selaéq-laéqne.”

³Menengang keturunan Harun bebase, “Kasih-Ne kekel selaéq-laéqne.”

⁴Menengang selapuq dengan saq takut léq ALLAH bebase, “Kasih-Ne kekel selaéq-laéqne.”

⁵Léq waktu tiang susah, tiang bekuih tipaq ALLAH ; beterus Ie jawab dait bébasang tiang.

⁶ Tiang ndéq leger séngaq ALLAH araq bareng kance tiang. Napi saq bau tepiaq siq manusie léq tiang?

⁷ALLAH araq kance tiang jari nulung tiang, tiang gen serioq musuh tiang tekalahang.

⁸Solahan berlindung léq ALLAH , ketimbang ngandelang manusie.

⁹Solahan berlindung léq ALLAH, ketimbang beharep léq dengan ménak.

¹⁰Luwéq musuh ngiterin tiang; siq kuase ALLAH , ie pade tiang kalahang.

¹¹Ie pade ngepung tiang léman selapuq andang; siq kuase ALLAH , ie pade tiang kalahang.

¹²Maraq kenyeruh ie pade keriwung tiang; siq kuase ALLAH , ie pade tiang kalahang. Maraq api saq julatang bebenes, sepengkejep mate ie pade tepedaqang.

¹³Tiang tedorong keras gati adéq tiang geriq laguq ALLAH nulung tiang.

¹⁴ ALLAH nike kekuatan tiang dait zabur tiang. Ie sampun nyelametang tiang.

¹⁵Dengahang surak kemenangan léq kémah-kémah umat-Ne, “Gading ALLAH saq kanan ngelaksaneang pegawéan perkase!

¹⁶Kuase ALLAH ngicanin ite kemenangan! Gading ALLAH saq kanan ngelaksaneang pegawéan perkase.”

¹⁷Tiang ndéq gen maté, laguq tetep idup jari nyeriteang karye ALLAH.

¹⁸ALLAH sampun secare keras didik tiang, laguq Ie nénten nyerahang tiang ojok maut.

¹⁹Bukaqang tiang jebak beléq kebenaran, adéq tiang tame ojok dalemne dait besyukur tipaq ALLAH .

²⁰Niki jebak beléq ALLAH , cume dengan-dengan saq kenaq doang saq kanggo tame ojok dalemne.

²¹Kaji memuji Deside, séngaq Deside ngabulang do'e kaji. Deside sampun ngicanin kaji kemenangan.

²² Batu saq tetetéh siq tukang-tukang bangunan, sampun jari batu saq paling utame.

²³Nike karye ALLAH, tetu-tetu ajaip tipaq ite.

²⁴Niki jelo saq tetentuang siq ALLAH , silaq ite rayeang siq sukecite.

²⁵ Ya ALLAH , tunas icanin kemenangan, ya ALLAH , tunas icanin kemenangan.

²⁶ Teberkahin ie saq dateng dalem peséngan ALLAH , tiang pade ngebéng side berkah léman Gedéng ALLAH .

²⁷ALLAH nike Tuhan, Ie murah até léq ite. Pade maju bedélok-délok sambil imene negel pémpang, dait kiterin méje taoq kurban bagi ALLAH.

²⁸Deside Allah kaji, kaji besyukur tipaq Deside, Ya Allah kaji, kaji agungang Deside.

²⁹Pade besyukur tipaq ALLAH séngaq Ie solah, kasih-Ne kekel selaéq-laéqne.