Read KITAB SUCI ZABUR INJIL ZABUR 119 Bible Online

ZABUR 119 - KITAB SUCI ZABUR INJIL bible

ZABUR 119

¹Bahagie dengan saq idupne ndéq bedowé cacat cele, saq idup menurut préntah ALLAH .

²Bahagie dengan saq taat léq hukum ALLAH , dait siq sepenoq angen berusahe boyaq ALLAH .

³Bahagie dengan saq idup menurut pekayunan ALLAH , dait ndéq gawéq kejahatan.

⁴Deside ngicanin kaji pade hukum Deside, adéq kaji pade setie adéq kaji pade setie ngelaksaneang hal nike.

⁵Semoge siq até saq teguq kaji turut aturan-aturan Deside.

⁶Lamun kaji merhatiang selapuq préntah Deside, make kaji nénten gen teperilaq.

⁷Lamun kaji perajahin keputusan Deside saq adil, kaji memuji Deside setulus até.

⁸Kaji mélé taat léq hukum Deside, sampunang gati bilin tiang.

⁹Siq care napi dengan bajang pertahenang kelakuanne adéq nénten bedowé cacat cele? Siq care jagaq kelakuanne sesuai kance manik Deside.

¹⁰Siq sepenoq angen kaji berusahe kenal kance Deside, sampunang menengang kaji nyimpang léman préntah Deside.

¹¹Janji Deside kaji simpen léq dalem atén kaji, adéq kaji ndaq jangke bedose léq Deside.

¹²Kaji memuji Deside, ya ALLAH, ajah kaji hukum Deside.

¹³Siq biwih kaji, kaji nyeriteang selapuq hukum saq Deside icanin.

¹⁴Kajiseneng turut préntah-préntah Deside, maraq bedowé segale macem dowé bande.

¹⁵Kaji mélé perajahin keputusan-keputusan Deside, dait merhatiang petunjuk-petunjuk Deside.

¹⁶Hukum Deside miaq kaji seneng; manik Deside nénten gen kaji lupaqang.

¹⁷Semoge Deside murah até léq hambe Deside niki, adéq tiang tetep idup dait taat léq manik Deside.

¹⁸Bukaq maten kaji adéq kaji nyerioq pengajahan saq ajaip léq dalem préntah Deside.

¹⁹Cume sementare kaji ndot léq dunie, sampunang seboq hukum Deside léman kaji.

²⁰Atén kaji sakit nahen rase kangen, kaji melét nenaoq hukum Deside sebilang waktu.

²¹Deside peringet dengan saq sombong, dait ngutuk dengan saq nyimpang léman préntah Deside.

²²Bébasang kaji léman penghinean dait celean ie pade, séngaq kaji ngelaksaneang aturan Deside.

²³Timaq pare penguase bekomplot ngelawan kaji, hambe Deside niki gen mikirang hukum Deside.

²⁴Aturan-aturan Deside jari penaséhat kaji saq nyenengang atén kaji.

²⁵Kaji begélaq léq kerepuk; tulakang idup kaji sesuai kance manik Deside.

²⁶Kaji ngakuq perbuatan kaji, beterus Deside jawab kaji; ajah kaji hukum Deside.

²⁷Piaq kaji ngerti hukum-hukum Deside, adéq kaji mikirang perbuatan-perbuatan Deside saq ajaip.

²⁸Jiwen tiang lebur anyong tetimpe siq kesusahan, teguqang kaji sesuai kance manik Deside.

²⁹Jaoqang kaji léman langan saq salaq, lantaran kesolahan Deside, ajah kaji préntah Deside.

³⁰Kaji sampun piléq jari taat, préntah Deside tetep kaji inget-inget.

³¹Kaji sampun taat léq peringetan-peringetan Deside, ya ALLAH, sampunang menengang kaji mauq ilaq.

³²Kaji gen turut petunjuk préntah Deside, séngaq Deside miaq kaji sayan ngerti.

³³Ya ALLAH, ajah kaji arti hukum-hukum Deside, adéq kaji turut hal nike jangke penutuq.

³⁴Piaq kaji ngerti préntah Deside adéq kaji taat, dait kaji laksaneang sepenoq angen.

³⁵Semoge kaji teguq betegelan léq préntah Deside, séngaq hal nike saq kaji demenang.

³⁶Icanin kaji niat jari taat léq aturan Deside, lebihan léman keméléq jari sugih.

³⁷Jagaq kaji adéq ndaq memaléq saq sie-sie, icanin kaji idup menurut pekayunan Deside.

³⁸Teguqang janji Deside léq hambe Deside niki, saq Deside icanin tipaq dengan saq takut léq Deside.

³⁹Jaoqang penghinean saq kaji takutang, séngaq hukum Deside tetu-tetu solah.

⁴⁰Icanin kaji idup baru, séngaq Deside adil, kaji beniat gen taat léq keputusan-keputusan Deside.

⁴¹Ya ALLAH, nyatayang berembé Deside ngasihin kaji, selametang kaji sesuai kance janji Deside.

⁴²Make tiang bau jawab dengan saq menghine kaji, séngaq kaji ngandelang manik Deside.

⁴³Tulung kaji adéq tetep ngucapang saq kenaq, séngaq kaji beharep léq keputusan Deside.

⁴⁴Kaji mélé negel préntah Deside, seterusne dait selaéq-laéqne.

⁴⁵Make kaji gen idup bébas, séngaq berusahe patuh léq pengajahan Deside.

⁴⁶Aturan Deside gen kaji beriteang ojok raje-raje, dait kaji nénten gen mauq ilaq.

⁴⁷Kaji seneng ngelaksaneang préntah Deside, séngaq préntah nike saq kaji demenang.

⁴⁸Kaji seneng dait hormat léq préntah Deside, hukum Deside gen kaji pikirang.

⁴⁹Ilingang manik saq Deside manikang léq hambe Deside niki, séngaq Deside ngicanin kaji harepan.

⁵⁰Niki saq hibur kaji léq dalem penderitean kaji, bahwe janji Deside nike ngicanin kaji idup.

⁵¹Kaji tehine gati siq dengan sombong, laguq kaji nénten nyimpang léman préntah Deside.

⁵²Tiang inget léq hukum Deside saq araq léman laéq, ya ALLAH make atén tiang tehibur.

⁵³Kaji sili gati léq dengan jahat, séngaq ie pade bilin préntah Deside.

⁵⁴Sengonéq idup kaji saq singket léq gumi, hukum Deside kaji jariang lagu-lagu pujian.

⁵⁵Léq waktu kelem kaji inget léq Deside, ya ALLAH , préntah Deside tetep kaji tegel.

⁵⁶Kaji mauq kebahagiean sewaktu taat léq préntah-préntah Deside.

⁵⁷Deside doang saq kaji melétang, ya ALLAH, tiang bejanji gen ngelaksaneang manik Deside.

⁵⁸Siq sepenoq angen kaji tunas belas kasihan Deside, periakang kaji sesuai kance janji Deside.

⁵⁹Kaji sampun mikirang kelakuan kaji, dait bejanji gen taat léq aturan Deside.

⁶⁰Kaji nyerepek dait nénten alon-alon jari ngelaksaneang préntah Deside.

⁶¹Dengan jahat masangang kaji tali perangkep, laguq kaji nénten ngelupaqang préntah Deside.

⁶²Tengaq kelem kaji ures jari besyukur léq Deside, lantaran keputusan-keputusan Deside saq adil.

⁶³Kaji besahabat kance selapuq dengan saq takut léq Deside, selapuq dengan saq ngelaksaneang préntah Deside.

⁶⁴Gumi penoq siq kasih Deside, ya ALLAH , ajah kaji hukum-hukum Deside.

⁶⁵Deside sampun nepatin janji Deside, ya ALLAH, dait ngelaksaneang saq solah tipaq hambe Deside.

⁶⁶Icanin kaji hikmat dait penenaoq, séngaq tiang percaye léq préntah-préntah Deside.

⁶⁷Sendéqman tehukum, kaji nyimpang léman manik Deside, mangkin kaji tegel préntah Deside.

⁶⁸Séngaq Deside solah dait ngelaksaneang saq solah, ajah kaji hukum-hukum Deside.

⁶⁹Dengan sombong pitnah kaji, laguq kaji siq sepenoq angen taat léq keputusan Deside.

⁷⁰Dengan-dengan nike nénten ngerti, laguq préntah Deside saq kaji demenang.

⁷¹Mule bagus Deside ngukum kaji, adéq kaji nenaoq hukum-hukum Deside.

⁷²Bagi kaji préntah Deside solahan ketimbang selapuq emas dait perak léq dunie.

⁷³Deside saq cipteang dait piaq kaji, icanin tiang pengertian jari berajah préntah-préntah Deside.

⁷⁴Dengan saq takut léq Deside gen seneng lamun serioq kaji, séngaq tiang beharep léq manik Deside.

⁷⁵Kaji nenaoq bahwe keputusan Deside adil, ya ALLAH, séngaq Deside setie, Deside sampun ngukum kaji.

⁷⁶Semoge kasih Deside hibur kaji, sesuai kance janji Deside léq hambe Deside.

⁷⁷Periakang tiang, make kaji tetep idup, séngaq préntah Deside saq kaji demenang.

⁷⁸Menengang dengan sombong jari ilaq séngaq sampun pitnah kaji, laguq kaji gen mikirang préntah-préntah Deside.

⁷⁹Semoge dengan saq takut léq Deside dateng ojok kaji, ie pade saq nenaoq aturan-aturan Deside.

⁸⁰Semoge atén kaji nénten nyimpang léman hukum Deside, adéq kaji nénten jari ilaq.

⁸¹Atén kaji kangen gati léq keselametan léman Deside; kaji beharep léq manik Deside.

⁸²Maten kaji lelah ngantos Deside nepatin janji Deside, kaji matur, “Piran Deside gen hibur kaji?”

⁸³Léndong kaji kisut maraq kantong anggur saq sampun lebung, laguq hukum Deside nénten kaji lupaqang.

⁸⁴Jangke piran hambe Deside harus sabar? Piran Deside gen ngukum dengan-dengan saq maléq kaji?

⁸⁵Dengan saq nénten taat léq préntah Deside, sampun kaliq loang jari bau kaji.

⁸⁶Selapuq hukum Deside bau teandelang, tulung kaji, séngaq ndéq araq alasan kaji tepaléq.

⁸⁷Aroh ie pade bau nyematéq kaji, laguq kaji nénten ngelupaqang préntah Deside.

⁸⁸Selametang kaji sesuai kance kasih dait setie Deside, adéq kaji bau taat léq hukum Deside.

⁸⁹Ya ALLAH, manik Deside teguq selaéq-laéqne, kekel selaéq-laéqne léq sorge.

⁹⁰Kesetiean Deside tahen sebelo jaman, Deside anjengang gumi sehingge tetep araq.

⁹¹Selapuq saq araq mangkin, araq lantaran préntah Deside, séngaq ie pade selapuq hambe-hambe Deside.

⁹²Seandéne préntah Deside nénten sumber sukecite kaji, pasti kaji sampun maté léq waktu kaji sengsare.

⁹³Kaji nénten gati gen ngelupaqang préntah Deside, séngaq siq care nike Deside ngidupang kaji.

⁹⁴Selametang kaji, séngaq kaji niki dowén Deside, kaji sampun berusahe taat léq keputusan Deside.

⁹⁵Dengan jahat ngantih mélé nyematéq kaji, laguq kaji mélé merhatiang hukum Deside.

⁹⁶Kaji sadar bahwe selapuq-lapuqne araq batesne, cume préntah Deside saq sempurne.

⁹⁷Kaji seneng gati léq préntah Deside; sejeloan kaji mikirang hal nike.

⁹⁸Kaji tetep inget léq préntah Deside, saq miaq kaji lebih bijaksane ketimbang musuh-musuh kaji.

⁹⁹Pengertian kaji lebihan léman pengertian guru-guru kaji, séngaq kaji mikirang préntah-préntah Deside.

¹⁰⁰Kaji lebih paham ketimbang dengan-dengan lingsir, séngaq kaji taat léq keputusan-keputusan Deside.

¹⁰¹Kaji jaoqin selapuq kelakuan jahat, adéq kaji taat léq manik Deside.

¹⁰²Kaji nénten ngelupaqang hukum Deside, séngaq Deside saq ngajah kaji.

¹⁰³Manis gati manik Deside, rasene manisan léman madulani!

¹⁰⁴Hukum-hukum Deside ngicanin kaji pengertian, sehingge kaji meriq siq kelakuan saq celang.

¹⁰⁵Manik Deside nike jari dilah naén kaji, jari cahaye léq langan kaji.

¹⁰⁶Saq kaji janjiqang siq sumpah gen kaji tepatin, jari negel keputusan Deside saq adil.

¹⁰⁷Kaji sengsare gati, ya ALLAH , jagaq idup kaji sesuai kance manik Deside.

¹⁰⁸Terimaq do'e syukur kaji, ya ALLAH , dait ajah kaji hukum-hukum Deside.

¹⁰⁹Kaji tetep taruhang nyawen kaji, laguq kaji nénten ngelupaqang préntah Deside.

¹¹⁰Dengan jahat masangang kaji perangkep, laguq kaji nénten nyimpang léman keputusan Deside.

¹¹¹Préntah Deside nike pusake kaji selaéqne-laéqne, saq miaq atén kaji seneng.

¹¹²Kaji beniat gen taat léq hukum Deside jangke penutuq idup kaji.

¹¹³Kaji seneng léq préntah Deside, kaji meriq léq dengan saq bimbang aténe.

¹¹⁴Deside pembéle dait pelindung kaji, kaji beharep léq manik Deside.

¹¹⁵Hai dengan jahat, nyedi léman tiang! Tiang mélé taat léq préntah Allah tiang.

¹¹⁶Teguqang kaji sesuai kance janji Deside adéq kaji idup, sampunang menengang kaji tekecéweang léq dalem pengharepan kaji.

¹¹⁷Tegel kaji adéq tiang selamet, dait tetep merhatiang préntah Deside.

¹¹⁸Deside nolaq dengan saq nyimpang léman hukum Deside, sie-sie doang tipu muslihat ie pade.

¹¹⁹Selapuq dengan jahat Deside anggep maraq dedoro, keranaq nike kaji seneng léq aturan-aturan Deside.

¹²⁰Kaji ngijik lantaran takut léq Deside, atén kaji leger siq keputusan Deside.

¹²¹Kaji sampun ngelaksaneang saq adil dait kenaq, sampunang nyerahang kaji ojok musuh.

¹²²Silaq bejanji bahwe Deside gen nulung kaji, sampunang menengang kaji tetindes siq dengan-dengan saq sombong.

¹²³Maten kaji peréq ngantos keselametan léman Deside, kaji ngantos janji Deside saq adil.

¹²⁴Perlakuang kaji sesuai kance kasih Deside, dait ajah kaji hukum Deside.

¹²⁵Kaji hambe Deside, piaq tiang ngerti, adéq kaji paham léq préntah Deside.

¹²⁶Ya ALLAH, sampun wayene Deside ngelaksaneang sopoq hal, séngaq dengan-dengan ngelanggar préntah Deside.

¹²⁷Kaji seneng léq préntah-préntah Deside malah lebihan léman emas, lebihan léman emas tulén.

¹²⁸Keranaq nike kaji idup sesuai kance selapuq petunjuk Deside; kaji meriq kelakuan saq celang.

¹²⁹Aturan-aturan Deside tetu-tetu miaq takjub, make kaji taat sepenoq angen.

¹³⁰Lamun tejelasang, manik Deside ngicanin cahaye, ngicanin pengertian tipaq dengan saq sederhane.

¹³¹Embok tiang sengal-sengal, séngaq kangen léq préntah Deside.

¹³²Silaq bebalik tipaq kaji dait periakang kaji, maraq Deside periak léq dengan saq seneng léq peséngan Deside.

¹³³Teguqang langkah kaji sesuai kance janji Deside, sampunang menengang kaji tekuasein siq kejahatan.

¹³⁴Bébasang kaji léman dengan-dengan saq nindes kaji, adéq kaji bau taat léq aturan Deside.

¹³⁵Icanin kaji berkah siq kehadiran Deside, dait ajah kaji hukum Deside.

¹³⁶Aiq maten kaji ngélék maraq kokoq, lantaran préntah Deside nénten tetaatin.

¹³⁷Deside adil, ya ALLAH , selapuq hukum Deside tepat.

¹³⁸Préntah-préntah saq Deside icanin adil dait bau teandelang.

¹³⁹Rase gedek kaji ngelaur dalem diriq kaji séngaq musuh kaji ngelupaqang manik Deside.

¹⁴⁰Janji Deside teguq dait bau tepercaye, kaji seneng gati léq hal nike.

¹⁴¹Kaji niki kodéq dait hine, laguq kaji ndéq ngelupaqang pengajahan Deside.

¹⁴²Keadilan Deside tahen selaéq-laéqne, dait préntah Deside tetep kenaq.

¹⁴³Kaji tetimpe luwéq masalah dait kesusahan, laguq hukum Deside nyenengang atén kaji.

¹⁴⁴Aturan Deside tetep adil; ngicanin kaji pengertian adéq kaji idup.

¹⁴⁵Siq sepenoq angen kaji bekuih tipaq Deside: Jawab kaji, ya ALLAH , kaji mélé taat léq préntah Deside.

¹⁴⁶Kaji bekuih tipaq Deside; selametang kaji, kaji mélé tegel aturan Deside.

¹⁴⁷Kelémaq-lémaq kaji ures dait bekuih nunas tulung; kaji beharep léq manik Deside.

¹⁴⁸Sekeleman kaji ngase, jari mikirang pengajahan Deside.

¹⁴⁹Pirengang kaji lantaran kasih Deside, ya ALLAH , jagaq idup kaji lantaran keadilan Deside.

¹⁵⁰Dengan saq maléq kaji sampun rapet, ie pade beniat jahat dait nénten merhatiang préntah Deside.

¹⁵¹Laguq Deside rapet, ya ALLAH , selapuq préntah Deside kenaq.

¹⁵²Léman laéq kaji nenaoq pengajahan-pengajahan Deside, bahwe Deside netepang hal nike selaéq-laéqne.

¹⁵³Cingakin penderitean kaji dait selametang kaji, séngaq kaji nénten ngelupaqang préntah Deside.

¹⁵⁴Béle pelekare kaji dait bébasang kaji; selametang kaji sesuai kance janji Deside.

¹⁵⁵Dengan jahat nénten gen teselametang, séngaq ndéq taat léq hukum Deside.

¹⁵⁶Tetu-tetu beléq belas kasihan Deside, ya ALLAH , selametang kaji sesuai kance keadilan Deside.

¹⁵⁷Luwéq dengan musuhin dait maléq kaji, laguq kaji nénten ngelupaqang aturan Deside.

¹⁵⁸Kaji meriq serioq penghianat-penghianat nike, séngaq ie pade nénten turut pengajahan Deside.

¹⁵⁹Cingakin berembé senengne kaji léq préntah Deside, ya ALLAH , selametang kaji sesuai kance kasih Deside.

¹⁶⁰Selapuq manik Deside kenaq, selapuq hukum Deside saq adil tetep selaéq-laéqne.

¹⁶¹Dengan-dengan saq bekuase maléq kaji nénten araq alasan, laguq cume manik Deside saq kaji takutang.

¹⁶²Janji Deside miaq kaji cemoh, maraq sopoq dengan saq ndait harte.

¹⁶³Selapuq duste kaji meriq, laguq préntah Deside kaji seneng.

¹⁶⁴Pituq kali sejelo kaji memuji-muji Deside, lantaran hukum Deside saq adil.

¹⁶⁵Dengan saq seneng léq préntah Deside aman dait tentrem, nénten araq saq bau halangin ie pade.

¹⁶⁶Kaji ngantos keselametan léman Deside, ya ALLAH , préntah-préntah Deside kaji laksaneang.

¹⁶⁷Kaji taat léq aturan-aturan Deside, dait kaji seneng gati léq hal nike.

¹⁶⁸Kaji patuh léq préntah dait petunjuk Deside, séngaq Deside cingakin selapuq perbuatan kaji.

¹⁶⁹Semoge Deside pirengang kuihan kaji, ya ALLAH , icanin kaji pengertian, sesuai kance manik Deside.

¹⁷⁰Menengang petunasan kaji rauh léq Deside, selametang kaji sesuai kance janji Deside.

¹⁷¹Kaji gen tetep memuji Deside, séngaq Deside ngajah kaji hukum Deside.

¹⁷²Kaji melét benyanyi mengenai janji Deside, séngaq selapuq préntah Deside adil.

¹⁷³Semoge Deside tetep réde nulung kaji, séngaq kaji piléq jari turut aturan Deside.

¹⁷⁴Atén kaji kangen léq keselametan léman Deside, préntah Deside miaq atén kaji cemoh.

¹⁷⁵Menengang kaji idup, adéq kaji memuji Deside, semoge hukum-hukum Deside nulung kaji.

¹⁷⁶Kaji kepusaq maraq dombe saq telang, keranaq nike silaq rauh dait boyaq hambe Deside niki, séngaq kaji nénten ngelupaqang préntah-préntah Deside.