Read KITAB SUCI ZABUR INJIL ZABUR 132 Bible Online

ZABUR 132 - KITAB SUCI ZABUR INJIL bible

ZABUR 132

¹Nyanyian siarah. Ya ALLAH , iling léq Daud, dait selapuq penderiteanne.

²Sampunang lupaq léq sumpahne, ya ALLAH , léq sesangine tipaq Deside Saq Mahekuat, Allah Yakub.

³Ie bebase, “Kaji nénten gen mentelah léq balén kaji atao tindoq léq petindoqan kaji,

⁵sendéqman nyedieang Allah Yakub gedéng, taoq ALLAH Saq Mahekuat meneng.”

⁶ Mule ite sampun dengah mengenai hal nike léq Eprata, terus ite ndait hal nike léq tanaq Yaar.

⁷Silaq ite lumbar ojok taoq ALLAH meneng, dait nyembah Ie léq arepan tahte-Ne.

⁸Silaq rauh dait meneng léq Gedéng Deside, ya ALLAH, bareng kance Peti Perjanjian, lambang kuase Deside.

⁹Semoge umat Deside besurak cemoh, dait pare imam Deside tetep idup menurut pekayunan Deside.

¹⁰Demi Daud, hambe Deside, sampunang nolaq raje saq Deside piléq.

¹¹ ALLAH sampun besumpah tipaq Daud; Ie nénten gen nilas janji-Ne. Manik-Ne, “Sopoq bijende gen Tiang jariang raje jari mréntah gentiq side.

¹²Lamun bije-bijende setie léq perjanjian Tiang, dait taat léq préntah-préntah Tiang, make selaéq-laéqne keturunan ie pade gentiq side jari raje.”

¹³Séngaq ALLAH sampun miléq Sion; Ie kayun Sion jari taoq-Ne meneng.

¹⁴Manik-Ne, “Léq deriki taoq Tiang ndot selaéq-laéqne, Tiang melét mréntah léq taoq niki.

¹⁵Selapuq keperluanne gen Tiang cukupang jangke limpah, dengan-denganne saq miskin Tiang béng ngelor jangke besuh.

¹⁶Imam-imamne metitoqang keselametan léman Tiang; umatne gen benyanyi dait besurak cemoh.

¹⁷ Léq deriki sopoq dengan keturunan Daud Tiang jariang raje; pemréntahanne gen Tiang kukuhang.

¹⁸Kerajaanne gen tetep sejahtere, laguq musuh-musuhne gen teperilaq.”