Read KITAB SUCI ZABUR INJIL ZABUR 135 Bible Online

ZABUR 135 - KITAB SUCI ZABUR INJIL bible

ZABUR 135

¹Pade puji ALLAH! Pade puji peséngan ALLAH , hai side hambe-hambe-Ne

²saq bebakti léq Gedéng ALLAH léq taoq Tuhante meneng.

³Pade puji ALLAH, séngaq Ie solah, pade puji peséngan-Ne, séngaq Ie murah até.

⁴Ie piléq Yakub umaq diriq-Ne, umat Israel tejariang dowé-Ne.

⁵Séngaq tiang nenaoq ALLAH nike maheagung, dait Junjungante Saq Mulie lebihan léman selapuq déwe.

⁶Ie ngelaksaneang napi saq Ie kayunang, léq langit dait léq gumi, léq segare dait segare galuh saq dalem.

⁷Léman poton gumi Ie datengang awan, Ie miaq kisap tebarengin ujan. Beterus Ie mréntahang angin adéqne sugul léman taoq-Ne nyimpen.

⁸Léq Mesir Ie nyematéq selapuq anak saq sengake léman manusie dait binatang.

⁹Léq derike Ie miaq luwéq keajaipan dait tande jari ngelawan raje Piraun dait selapuq pegawéne.

¹⁰Ie binaseang luwéq bangse, dait nyematéq raje-raje perkase:

¹¹Sihon raje Amori dait Og raje Basan, dait selapuq raje léq Kanaan.

¹²Beterus negeri ie pade serahang-Ne jari dowé pusake Israel, umat-Ne.

¹³Ya ALLAH , Deside gen tetep teberiteang, dait peséngan Deside teinget siq selapuq keturunan,

¹⁴séngaq Deside ngicanin keadilan tipaq umat Deside, dait periak léq hambe-hambe Deside.

¹⁵ Berhale ie pade léman emas dait perak, saq tepiaq siq ime manusie.

¹⁶Ie pade bedowé biwih, laguq ndéqne tao ngeraos, bedowé mate, laguq déqne tao nyerioq.

¹⁷Ie pade bedowé kentok, laguq ndéqne tao dedengah, léman biwihne ndéq sugul embok.

¹⁸Semoge maraq nike nasib dengan-dengan saq miaq ie, dait saq percaye léq ie.

¹⁹Pade puji ALLAH , hai umat Israel, pade puji Ie, hai keturunan Harun!

²⁰Pade puji ALLAH , hai dengan-dengan Lewi, pade puji Ie, side selapuq dengan saq takut léq ALLAH .

²¹Pade puji ALLAH léq Sion, léq Yerusalem taoq-Ne meneng. Pade puji ALLAH !