Read KITAB SUCI ZABUR INJIL ZABUR 139 Bible Online

ZABUR 139 - KITAB SUCI ZABUR INJIL bible

ZABUR 139

¹Umaq pemimpin kor. Zabur Daud. Ya ALLAH, Deside selidik kaji dait kenal kance kaji.

²Deside wikan selapuq perbuatan kaji; léman jaoq Deside ngerti pikiran kaji.

³Deside cingakin tiang, timaq kaji begawéan atao mentelah, Deside wikan selapuq saq kaji piaq.

⁴Malahan sendéqman tiang ngeraos, Deside wikan napi saq gen kaji ucapang.

⁵Deside ngiterin kaji léman selapuq andang, dait Deside lindungin kaji siq kuase Deside.

⁶Bagi kaji ajaip gati pewikan Deside nike, nénten bau kaji pikirang.

⁷Ojok mbé lain kaji adéq bau jaoq léman Roh Deside? Ojok mbé lain kaji pelai adéq jaoq léman arepan Deside?

⁸Lamun kaji taék ojok langit, Deside araq léq derike, lamun kaji tindoq léq alam maut, léq derike éndah Deside araq.

⁹Lamun kaji kélép ojok taoq jelo tiwoq atao ndot léq poto Bat saq paling jaoq,

¹⁰léq derike éndah Deside nulung kaji; léq derike éndah gading Deside bimbing kaji.

¹¹Lamun kaji tunas adéq kaji tekudung siq peteng, dait terang léq sekelining kaji jari kemalem,

¹²make peteng nike éndah nénten peteng bagi Deside; kelem nike terang maraq kenjelo, dait peteng nike maraq terang.

¹³Deside cipteang sebilang bagian léman awak kaji, dait miaq tiang léq dalem tian inaq kaji.

¹⁴Kaji memuji Deside séngaq kaji tecipteang secare luar biase gati! Selapuq karye Deside ajaip dait miaq takjub, kaji tetu-tetu sadar léq hal nike.

¹⁵Sewaktu tolang-tolang kaji tepiaq, secare teliti tesusun léq dalem tian inaq kaji, dait kaji sayan beléq léq derike secare rahasie, kaji nénten bau nyeboq léman Deside.

¹⁶Deside cingakin kaji léq waktu kaji masih léq dalem tian inaq kaji; selapuqne tecatet léq dalem kitab Deside; jelo-jelone sampun tetentuang sendéqman sopoq jelo juaq temulai.

¹⁷Bagi kaji, pikiran Deside nike sengke gati, ya Allah, dait jumlahne luwéq gati!

¹⁸Lamun kaji rékéng, luwéqan léman gerés; lamun kaji ures, masih doang tiang mikirang Deside.

¹⁹Semoge dengan jahat Deside musnahang, ya Allah, jaoqang tukang-tukang nyematéq léman kaji!

²⁰Ie pade ngeraosang saq jahat mengenai Deside, dait besumpah palsu demi kote-kote Deside.

²¹Ya ALLAH , kaji meriq léq dengan saq meriq léq Deside, atén kaji sepaq léq dengan saq ngelawan Deside!

²²Kaji meriq gati léq ie pade, dait kaji anggep jari musuh.

²³Selidik kaji, ya Allah, wikanang atén kaji, uji kaji dait wikanang pikiran kaji.

²⁴Cingakin sang araq kejahatan léq dalem diriq kaji, dait bimbing kaji léq langan saq kekel.