Read KITAB SUCI ZABUR INJIL ZABUR 140 Bible Online

ZABUR 140 - KITAB SUCI ZABUR INJIL bible

ZABUR 140

¹Umaq pemimpin kor. Zabur Daud.

²Luputang kaji léman dengan jahat, ya ALLAH , jagaq kaji léman dengan saq gawéq kekerasan.

³Ie pade ngerencaneang kejahatan léq dalem aténe, dait sebilang jelo nimbulang pegejuhan.

⁴ Élaq ie pade maraq ulah saq beracun, ucapan-ucapan ie pade maraq racun ulah senduk.

⁵Ya ALLAH , lindungin kaji léman kuase dengan jahat, jagaq kaji léman dengan saq gawéq kekerasan dait beniat gen geriqang kaji.

⁶Kaji tepasangang perangkep secare tedoq-tedoq siq dengan sombong, dait tepentangan jaring jari bau kaji. Léq sebélo rurung ie pade masang perangkep jari bau kaji.

⁷Ya ALLAH , kaji matur: Deside Allah kaji, pirengang do'e petunasan kaji.

⁸Ya ALLAH, Junjungan kaji Saq Mulie, penyelamet kaji saq kuat, Deside sampun ngelindungin kaji léq dalem perang.

⁹Sampunang kabulang keméléq dengan jahat, ya ALLAH , sampunang menengang rencane ie pade telaksane.

¹⁰Sampunang menengang musuh kaji menang; menengang ucapan-ucapan jahat saq ie pade ucapang nimpe diriqne mésaq.

¹¹Menengang ie pade teujanin siq barak api, dait tetetéh ojok loang maut, sehingge nénten iniq sugul malik.

¹²Menengang ie pade saq gawéq kekerasan tetimpe siq bahle, sampunang menengang tukang pitnah ndot léq gumi.

¹³Kaji nenaoq Deside ngicanin keadilan tipaq dengan saq tetindes, dait béle pelekare dengan miskin.

¹⁴Dengan jujur gen memuji Deside; ie pade gen ndot bareng Deside.