Read KITAB SUCI ZABUR INJIL ZABUR 143 Bible Online

ZABUR 143 - KITAB SUCI ZABUR INJIL bible

ZABUR 143

¹Zabur Daud. Ya ALLAH , pirengang do'e kaji, perhatiang petunasan kaji. Jawab kaji demi kesetiean Deside, kabulang do'e kaji demi keadilan Deside.

² Kaji niki hambe Deside, sampunang ngadilin kaji, séngaq nénten araq dengan saq nénten bedowé salaq léq arepan Deside.

³Musuh kaji sampun maléq dait ngalahang kaji, dait namaqang kaji ojok dalem bui saq peteng; kaji jari maraq dengan saq sampun ngonéq maté.

⁴Kaji sampun nénten bedowé semanget, atén kaji bingung gati.

⁵Kaji inget jelo-jelo saq laéq; kaji mikirang selapuq perbuatan Deside, kaji mikirang selapuq karye Deside.

⁶Kaji angkat imen kaji sewaktu bedo'e tipaq Deside; maraq tanaq saq gero, jiwen kaji kangen léq Deside.

⁷Gelis jawab kaji, ya ALLAH , séngaq kaji sampun putus ase. Sampunang nyeboq léman kaji, adéq kaji ndaq maraq dengan saq sampun turun ojok alam maut.

⁸Sebilang kelémaq ingetang kaji léq kasih Deside, séngaq léq Deside doang kaji beharep. Petitoqang kaji langan saq harus kaji liwatin, séngaq tipaq Deside doang kaji bedo'e.

⁹Kaji parek mélé berlindung léq Deside, ya ALLAH , bébasang kaji léman musuh-musuh kaji.

¹⁰Ajah kaji ngelaksaneang pekayunan Deside, séngaq Deside Allah kaji. Deside solah, dait gen bimbing kaji léq langan saq rate.

¹¹Selametang kaji lantaran peséngan Deside, ya ALLAH , bébasang kaji léman kesusahan demi keadilan Deside!

¹²Demi kasih Deside musnahang selapuq musuh kaji, binaseang selapuq dengan saq nindes kaji, séngaq kaji hambe Deside.