Read KITAB SUCI ZABUR INJIL ZABUR 144 Bible Online

ZABUR 144 - KITAB SUCI ZABUR INJIL bible

ZABUR 144

¹Léman Daud. Pade puji ALLAH pelindung tiang! Ie ngelatih tiang betempur, dait ngajah tiang perang.

²Ie penulung dait pembéle tiang, penyelamet tiang dait taoq tiang berlindung. Ie pelindung tiang, taoq tiang berlindung, bangse-bangse Ie taklukang tipaq tiang.

³ Ya ALLAH napi manusie nike sehingge Deside perhatiang ie? Sai ie sehingge Deside peliharaq?

⁴Manusie nike maraq emposan angin, maraq lingon saq liwat, maraq nike idupne.

⁵Ya ALLAH , bukaq langit Deside dait silaq turun, kintur gunung-gunung adéq nyugulang pendet.

⁶Saut kisap Deside adéq musuh jari buyar, lecatang panaq Deside adéq ie pade jari oregade.

⁷Ulurang gading Deside léman sorge, dait bébasang kaji léman belabur. Selametang kaji léman kuase dengan pendateng

⁸saq girang beduste dait nipu, dait ngucapang sumpah palsu.

⁹Kaji gen nyanyiang Deside lagu baru, ya Allah, dait puniq kecapi sambil benyanyi.

¹⁰Deside ngicanin kemenangan tipaq raje-raje, dait bébasang Daud hambe Deside.

¹¹Luputang kaji léman kléwang dengan saq sewenang-wenang; selametang kaji léman kuase dengan pendateng, saq girang beduste dait nipu, dait ngucapang sumpah palsu.

¹²Semoge bije-bije mamente léq waktu terunene maraq tetaletan saq jari sayan beléq. Semoge bije-bije ninente maraq teken saq inges, saq ngerias sebilang bucu istane.

¹³Semoge gudang-gudangte penoq isine siq segale macem hasil gumi. Semoge dombe-dombe léq lendang-lendangte, sayan bejari jangke puluan iyu luwéqne.

¹⁴Semoge sampi-sampinte sayan bejari dait ndéq araq saq telang atao nyelawoq. Semoge ndéq kedengahan kuihan sengsare léq rurung-rurung kotente.

¹⁵Bahagie bangse saq maraq nike, bahagie bangse saq jariang ALLAH nike Tuhanne!