Read KITAB SUCI ZABUR INJIL ZABUR 145 Bible Online

ZABUR 145 - KITAB SUCI ZABUR INJIL bible

ZABUR 145

¹Pujian léman Daud. Kaji mélé agungang Deside, ya Allah kaji dait Raje kaji, dait tetep memuji peséngan Deside selaéq-laéqne.

²Sebilang jelo kaji mélé besyukur tipaq Deside, dait tetep mulieang peséngan Deside selaéq-laéqne.

³Séngaq ALLAH agung dait sanget tepuji, keagungan-Ne nénten bau ite pahamin.

⁴Turun-temurun dengan gen memuji karye Deside dait nyeriteang keperkasean Deside.

⁵Ie pade gen beriteang keagungan dait kemuliean Deside, karye Deside saq ajaip gen kaji pikirang.

⁶Ie pade beriteang perbuatan-perbuatan Deside saq beléq, keagungan Deside gen kaji ceriteang.

⁷Dengan gen nyeriteang selapuq kesolahan Deside dait benyanyi mengenai keadilan Deside.

⁸ALLAH nike pengasih dait penyayang, nénten gelis menggah dait beléq kasih dait setie-Ne.

⁹Ie murah até tipaq sebilang dengan, dait periak léq selapuq ciptean-Ne.

¹⁰Selapuq ciptean Deside gen ngucap syukur léq Deside, ya ALLAH, selapuq umat Deside gen besyukur tipaq Deside.

¹¹Ie pade gen ngagungang kuase Deside sebagé Raje, dait nyeriteang keperkasean Deside,

¹²adéq selapuq dengan nenaoq perbuatan Deside saq beléq, dait kerajaan Deside saq agung dait mulie.

¹³Pemréntahan Deside tetep selaéq jaman, kekuasean Deside tahen turun-temurun. ALLAH setie léq selapuq janji-Ne, Ie penoq kasih léq dalem selapuq karye-Ne.

¹⁴ALLAH nulung dengan saq kenyeke susah, Ie panjengang dengan-dengan saq nunduk.

¹⁵Selapuq mahluk idup beharep léq Deside; Deside ngicanin ie pade ngelor léq waktune.

¹⁶Deside penoqin selapuq keperluan ie pade, sehingge ie pade nénten kurang napi-napi.

¹⁷ALLAH adil léq dalem selapuq saq Ie laksaneang dait penoq kasih léq dalem selapuq karye-Ne.

¹⁸Ie rapet kance sebilang dengan saq bekuih tipaq Ie, dait nunas léq Ie setulus até.

¹⁹Ie nyenengang até dengan saq takut léq Ie; Ie pirengang kuihan ie pade dait nyelametang ie pade.

²⁰Ie ngelindungin sebilang dengan saq ngasihin Ie, laguq dengan jahat Ie binaseang.

²¹Tiang mélé memuji ALLAH sebilang waktu, semoge selapuq mahluk-Ne memuji peséngan ALLAH saq suci selaéq-laéqne.