Read KITAB SUCI ZABUR INJIL ZABUR 146 Bible Online

ZABUR 146 - KITAB SUCI ZABUR INJIL bible

ZABUR 146

¹Pade puji ALLAH ! Hai jiwen tiang, pade puji ALLAH !

²Tiang mélé memuji ALLAH semasih tiang idup dait benyanyi bagi Allah tiang sengonéq tiang araq.

³Sampunang beharep tipaq penguase, tipaq manusie saq ndéq tao nyelametang.

⁴Lamun ie pade pegat nyawene, ie pade tulak ojok tanaq; jelo nike éndah selapuq rencane ie pade telang.

⁵Bahagie dengan saq ngandelang ALLAH , Tuhanne, saq bedowé Allah Yakub jari penulungne.

⁶ Ie saq cipteang langit dait gumi, segare dait selapuq isine; Ie tetep setie selaéq-laéqne.

⁷Ie béle hak dengan-dengan saq tetindes, dait ngicanin ngelor dengan saq lapah. ALLAH bébasang dengan-dengan saq tebui,

⁸dait miaq dengan bute tao nyerioq. Ie panjengang dengan saq nunduk, dait ngasihin dengan saq kenaq.

⁹Ie ngelindungin dengan-dengan pendateng; Ie nulung bebalu-bebalu dait anak iwoq, laguq rencane dengan jahat tepiaq ore.

¹⁰ALLAH nike Raje selaéq-laéqne. Hai Sion, Tuhande bekuase selaéq-laéqne. Pade puji ALLAH !