Read KITAB SUCI ZABUR INJIL ZABUR 147 Bible Online

ZABUR 147 - KITAB SUCI ZABUR INJIL bible

ZABUR 147

¹Pade puji ALLAH ! Séngaq mule solah memuji Tuhante, malahan nyenengang gati nyanyiang pujian bagi Ie!

²ALLAH gen nulakang keadaan Yerusalem; dengan-dengan saq tetetéh gen Ie gadingang uléq.

³Ie nyelahang dengan saq polak angen, dait bebet bakat-bakat ie pade.

⁴Ie nentuang jumlah bintang-bintang, dait sopoq-sopoq Ie aranin.

⁵Tetu-tetu agung dait hébat Junjungante Saq Mulie nike, kebijaksanean-Ne nénten araq batesne.

⁶ALLAH ngangkat dengan saq tetindes, laguq dengan jahat Ie tetéh ojok tanaq.

⁷Pade nyanyiang puji-pujian bagi ALLAH, puniqang kecapi bagi Tuhante.

⁸Ie kelat awan léq langit; Ie nyedieang ujan umaq gumi, dait miaq pupaq tiwoq léq gunung-gunung.

⁹Ie ngicanin kakenan tipaq héwan, dait tipaq anak kedit gagak saq kenyeke bekuih-kuih.

¹⁰Ie nénten suke jaran saq kuat; nénten éndah pejuang saq wanén.

¹¹ALLAH seneng léq dengan saq takut léq Ie, tipaq dengan saq tetep beharep léq kasih-Ne.

¹²Pade puji ALLAH , hai Yerusalem! Pade puji Tuhande, hai Sion!

¹³Séngaq Ie saq kukuhang jebak-jebak beléqde, dait ngicanin pendudukde berkah.

¹⁴Ie jagaq daérahde adéq tetep aman, dait besuhang side siq gandum saq paling solah.

¹⁵Ie ngicanin préntah tipaq gumi, dait manik-Ne langsung telaksaneang.

¹⁶Ie nurunang salju maraq kapas, dait nyangkurang awun-awun saq tegéng maraq kerepuk.

¹⁷Ie nurunang ujan és maraq gerisak; nénten araq saq tahen siq nyetne.

¹⁸Beterus Ie bemanik, make és nike anyong; Ie niup angin, make aiq ngélék.

¹⁹Ie nyampéang manik-Ne tipaq umat-Ne, aturan-aturan dait hukum-hukum-Ne tipaq Israel.

²⁰Ie nénten piaq maraq nike tipaq bangse-bangse lain, ie pade nénten nenaoq hukum-hukum-Ne. Pade puji ALLAH !