Read KITAB SUCI ZABUR INJIL ZABUR 148 Bible Online

ZABUR 148 - KITAB SUCI ZABUR INJIL bible

ZABUR 148

¹Pade puji ALLAH ! Pade puji ALLAH léq sorge! Pade puji Ie léman taoq saq atas!

²Pade puji Ie, hai selapuq malaékat-Ne, pade puji Ie, hai selapuq tentere sorge!

³Pade puji Ie, hai jelo dait bulan, pade puji Ie, hai bintang-bintang saq ngempor!

⁴Pade puji Ie, hai langit saq paling atas, pade puji Ie, hai aiq léq atas langit!

⁵Solahan ie pade selapuq memuji peséngan ALLAH , séngaq selapuq tecipteang siq préntah-Ne.

⁶Ie nentuang taoqne sopoq-sopoq jangke seterusne dait selaéq-laéqne, dait ngicanin aturan saq ndéq bau telanggar.

⁷Pade puji ALLAH léq gumi, hai nage-nage segare dait selapuq segare saq galuh;

⁸hai kisap dait ujan és, salju dait awan, angin beleq saq turut manik ALLAH!

⁹Pade puji Ie, hai bukit-bukit dait gunung-gunung, leloloan saq ngasilang buaq dait selapuq gawah;

¹⁰selapuq ternak dait binatang gamang, selapuq binatang saq ngumang dait kedit!

¹¹Pade puji ALLAH, hai raje-raje dait selapuq bangse, pare ménak dait selapuq penguase;

¹²selapuq terune dait dedare, dengan lingsir dait dengan bajang.

¹³Alurang ie pade selapuq memuji peséngan ALLAH, lantaran peséngan-Ne agungan léman selapuq peséngan; keagungan-Ne atasan léman langit dait gumi.

¹⁴Ie sampun neguqang bangse-Ne, sehingge Ie tepuji-puji siq umat-Ne, Israel, umat kesayangan-Ne. Pade puji ALLAH !