Read KITAB SUCI ZABUR INJIL ZABUR 17 Bible Online

ZABUR 17 - KITAB SUCI ZABUR INJIL bible

ZABUR 17

¹Do'e Daud. Pirengang kuihan kaji nunas keadilan, perhatiang do'e kaji saq tulus, ya ALLAH.

²Silaq béle pelekare kaji séngaq Deside wikan napi saq kenaq.

³Lamun Deside nguji atén kaji dait rauh selidik kaji léq kekelem, gen Deside ndait bahwe kaji tulus ihlas; ucapan kaji pade kance pikiran kaji.

⁴Kaji ngelaksaneang sesuai kance manik saq Deside sampéang dait kaji nénten gawéq kekerasan.

⁵Kaji tetep idup menurut petunjuk Deside dait nénten nyimpang léman petunjuk Deside nike.

⁶Kaji bekuih tipaq Deside, ya Allah, séngaq Deside jawab kaji; perhatiang kaji dait pirengang ucapan-ucapan kaji.

⁷Nyatayang kasih Deside saq ajaip séngaq Deside nyelametang dengan saq berlindung léq Deside, léq dékét Deside ie pade aman léman serangan musuh.

⁸Peliharaq kaji maraq penyermin Deside, seboq kaji léq dalem dekepan keléték Deside

⁹léman serangan dengan jahat. Kaji tekepung siq musuh saq mélé nyematéq kaji.

¹⁰Ie pade nénten araq periakne dait ngeraos siq sombongne.

¹¹Ie pade maju ngelawan kaji dait keriwung kaji, boyaq kesempatan jari nimplak kaji.

¹²Ie pade maraq singe saq mélé nyakrah mangsene, singe mendare saq ngadang léq taoq saq sepi.

¹³Silaq bangkit, ya ALLAH, lawan musuh kaji dait kalahang ie pade. Selametang kaji siq kléwang Deside léman serangan dengan jahat.

¹⁴Lepasang kaji léman dengan-dengan saq numpuk harte léq dunie. Hukum ie pade siq bahle saq sampun Deside sedieang umaq ie pade. Menengang anak bai ie pade éndah tehukum.

¹⁵Laguq kaji, léq dalem kebenaran gen serioq Deside. Léq waktu kaji ures, kehadiran Deside miaq atén kaji puas.