Read KITAB SUCI ZABUR INJIL ZABUR 18 Bible Online

ZABUR 18 - KITAB SUCI ZABUR INJIL bible

ZABUR 18

¹Umaq pemimpin kor. Zabur Daud, hambe ALLAH. Tenyanyiang bagi ALLAH sewaktu Daud telepasang léman Saul dait léman musuh-musuhne.

²Kaji ngasihin Deside, ya ALLAH, Deside kekuatan kaji.

³Ya ALLAH Deside maraq bénténg saq kuat taoq kaji berlindung. Allah kaji maraq gunung batu taoq kaji bebao, dait maraq éndé saq kudung kaji, dait jagaq kaji adéq tetep aman.

⁴Tiang bekuih tipaq ALLAH saq patut tepuji, Ie bébasang tiang léman musuh-musuh tiang.

⁵Tiang tekeliningin siq bahaye maut dait tekeliningin siq kebinasean saq dateng maraq aiq belabur.

⁶Tiang tekeliningin siq bahaye maut, perangkep maut araq léq julu tiang.

⁷Dalem keadaan tiang saq kebucuq tiang bekuih tipaq ALLAH, tiang bekuih léq Allah tiang nunas tulung. Léman Gedéng-Ne, Ie mirengang suare tiang dait merhatiang kuihan tiang.

⁸Beterus gumi inggur dait ngijik, dasar-dasar gunung injok dait ngijik lantaran kemurkean Allah!

⁹Pendet nyempuq léman irung-Ne, api dait barak sugul léman cangkem-Ne.

¹⁰Ie belaq langit terus Ie turun, araq awan peteng léq bawaq cokor-Ne.

¹¹Ie kélép kadu kerub; Ie ngelayang léq atas keléték angin.

¹²Ie kelumbung diriq-Ne siq peteng; awan saq tebel ngiterin Ie.

¹³Léman kisap léq arepan-Ne, sugul awan, ujan és dait api.

¹⁴Beterus ALLAH begerudug léman awang-awang, Saq Maheagung pedengah suare-Ne.

¹⁵Ie ngelecatang panaq-panaq-Ne, dait kebiar musuh-Ne; Ie samberang kisap beulang-ulang, dait miaq ie pade pelai.

¹⁶Dasar segare kebukaq dait alas gumi ngangaq sewaktu ALLAH nyemprak musuh-Ne siq murke.

¹⁷Léman atas ALLAH ngulurang gading-Ne; Ie tegel tiang dait antuq-Ne léman aiq saq dalem.

¹⁸Ie nyelametang tiang léman musuh saq perkase dait léman dengan-dengan saq meriq léq tiang, séngaq bagi tiang ie pade kuat gati.

¹⁹Ie pade nyerang tiang sewaktu tiang tetimpe siq bahle, laguq ALLAH jari penulung tiang.

²⁰Ie ngelepasang tiang léman bahaye dait nyelametang tiang séngaq Ie suke kance tiang.

²¹ALLAH bales perbuatan tiang saq kenaq; Ie ngicanin tiang berkah séngaq tiang ndéng salaq.

²²Tiang taat léq préntah ALLAH dait ndéq nyimpang léman Allah tiang.

²³Selapuq hukum-Ne tiang perhatiang, préntah-préntah-Ne ndéq tiang lupaqang.

²⁴Ie wikan bahwe tiang ndéq bedowé cele dait jaoqang diriq léman kesalaqan.

²⁵Make ALLAH bales perbuatan tiang saq kenaq séngaq Ie wikan tiang ndéq salaq.

²⁶Ya ALLAH, Deside setie léq dengan saq setie dait solah léq dengan saq solah.

²⁷Tipaq dengan saq suci Deside nyatayang kesucian Deside, laguq dengan saq jahat Deside musuhin.

²⁸Dengan saq rendah até Deside selametang, laguq dengan saq sombong Deside taklukang.

²⁹Deside penyalaq dilah kaji; ALLAH, Tuhan kaji menahin peteng saq araq léq kaji.

³⁰Deside nguatang kaji jari ngalahang musuh; siq pertulungan Allah kaji, kaji sanggup ngancurang pertahenan ie pade.

³¹Perbuatan Allah sempurne janji ALLAH bau tepercaye. Ie jari éndé selapuq dengan saq berlindung léq Ie.

³²Séngaq cume ALLAH nike Tuhan; Allah doang pembélente.

³³Ie Allah saq nguatang tiang dait miaq langan tiang aman.

³⁴ Ie neguqang naén tiang maraq naén mayung, dait jagaq keselametan tiang léq pegunungan.

³⁵Ie ngelatih tiang beperang, sehingge tiang tao ngedeng busur saq paling kuat.

³⁶Ya ALLAH, Deside ngelindungin dait nyelametang kaji, dait nenahen kaji siq kuase Deside; kemurahan Deside beléqang angen kaji.

³⁷Deside jagaq kaji adéq kaji nénten tebau siq musuh, dait kaji nénten uwah geriq.

³⁸Kaji paléq musuh kaji dait kaji kalahang ie pade, dait nénten gen mundur jangke ie pade binase.

³⁹Kaji timplak ie pade jangke nénten iniq ures malik, ie pade rebaq léq julun naén kaji.

⁴⁰Deside icanin kaji kekuatan jari beperang, dait kemenangan léman musuh-musuh kaji.

⁴¹Deside piaq musuh kaji pelai léman kaji; dengan-dengan saq meriq léq kaji, kaji binaseang.

⁴²Ie pade bekuih, laguq nénten araq saq nulung, ie pade bekuih tipaq ALLAH, laguq ALLAH nénten bejawab.

⁴³Ie pade kaji remukang maraq kerepuk saq kesangkur, dait kaji sapu maraq reraok léq langan.

⁴⁴Deside bébasang kaji léman kaum saq durhake, dait jariang kaji penguase bangse-bangse; bangse saq nénten kaji kenal jari hambe kaji.

⁴⁵Dengan-dengan pendateng tunduk léq kaji dait taat lamun dengah préntah kaji.

⁴⁶Ie pade sampun engkah wanén; ie pade ngijik dait sugul léman taoqne nyeboq.

⁴⁷ALLAH idup! Tepuji pembéle tiang! Mulie Allah Penyelamet tiang!

⁴⁸Ie ngicanin tiang kemenangan léman musuh tiang; bangse-bangse Ie taklukang léq julu tiang,

⁴⁹Ie nyelametang tiang léman musuh-musuh tiang. Ya ALLAH, Deside icanin kaji kemenangan léman musuh kaji, Deside lindungin kaji léman dengan-dengan saq kejem.

⁵⁰ Keranaq nike kaji nyanyiang syukur bagi Deside léq antare bangse-bangse, dait kaji nyanyiang puji-pujian bagi peséngan Deside.

⁵¹Allah ngicanin kemenangan beléq tipaq raje-Ne, Ie tetep ngasihin dengan saq Ie piléq, nike Daud dait keturunanne selaéq-laéqne.