Read KITAB SUCI ZABUR INJIL ZABUR 19 Bible Online

ZABUR 19 - KITAB SUCI ZABUR INJIL bible

ZABUR 19

¹Umaq pemimpin kor. Zabur Daud.

²Langit nyeriteang kemuliean Allah, dait cakrewale beriteang karye-Ne.

³Jelo nerusang berite nike tipaq jelo saq lain, dait kelem nyampéang penenaoq nike tipaq kelem saq lain.

⁴Ndéq araq berite dait ndéq araq ucapan, suare ie pade ndéq kedengahan.

⁵ Laguq gaungne kedengahan léq seantéro dunie, pesen nike jangke ojok poton-poton gumi. Jelo tepiaqang kémah léq langit siq ALLAH,

⁶kelémaq-lémaq ie tiwoq maraq pengantén mame sugul léman kamarne, maraq pahlawan saq gembire mulai kelampanne.

⁷Ie bedurus léq langit léman poto ojok poto saq lain; selapuqne kene siq panasne.

⁸Préntah ALLAH nike sempurne, nyegerang jiwe. Préntah ALLAH nike bau tepercaye, ngicanin hikmat tipaq dengan saq sederhane.

⁹Aturan ALLAH nike tepat, nyenengang até. Hukum ALLAH nike murni, miaq dengan ngerti.

¹⁰Bebakti tipaq ALLAH nike solah, jangke selaéq-laéqne. Hukum ALLAH nike kenaq dait adil selapuqne.

¹¹Hukum ALLAH nike solahan ketimbang emas tulén, manisan léman madulani tulén.

¹²Hambe Deside teperinget siq selapuqne nike; upaq saq beléq tesedieang umaq dengan saq taat.

¹³Ndéq araq saq iniq sadar léman kesesatanne; ya ALLAH bébasang kaji léman kesalaqan saq nénten sadar kaji piaq.

¹⁴Jaoqang kaji léman dose saq tesediah, sampunang menengang kaji tekuasein siq dose nike. Make kaji jari nénten bedowé cele, dait bébas léman pelanggaran berat.

¹⁵Semoge ucapan-ucapan dait pikiran kaji nyenengang Deside, ya ALLAH, pelindung dait penebus kaji!