Read KITAB SUCI ZABUR INJIL ZABUR 21 Bible Online

ZABUR 21 - KITAB SUCI ZABUR INJIL bible

ZABUR 21

¹Umaq pemimpin kor. Zabur Daud.

²Ya ALLAH, raje jari cemoh séngaq Deside neguqang ie; ie besukecite lantaran kemenangan saq Deside icanin tipaq ie!

³Deside sampun ngicanin napi saq jari keméléq angenne, dait ngicanin napi saq ie tunas.

⁴Deside rauh tipaq ie siq berkah saq belimpah, dait masangang mahkote emas léq ulune.

⁵Ie nunas idup, dait Deside icanin ie malahan umur saq bélo selaéq-laéqne.

⁶Lantaran pertulungan Deside ie jari tehormatin gati, Deside jariang ie kesohor dait mulie.

⁷Deside icanin ie berkah jangke seterusne; kehadiran Deside miaq ie penoq siq sukecite.

⁸Raje beharep léq ALLAH Saq Maheagung, ie tetep aman séngaq tetep tekasihin siq ALLAH.

⁹Ie gen nenahen selapuq musuhne, dait bau selapuq dengan saq meriq léq Ie.

¹⁰Ie rauh maraq api saq ngelaur jari binaseang ie pade. Ie pade gen temusnahang siq murke ALLAH, dait siq api saq ngotongang.

¹¹Léman keturunan ie pade ndéq araq saq masih, raje gen binaseang ie pade selapuq.

¹²Lamun ie pade miaq rencane ngelawan raje, tipu muslihat ie pade ndéq gen berhasil.

¹³Ie gen papahang panaq-Ne, sehingge ie pade bebalik dait pelai.

¹⁴Kaji pade memuji Deside, ya ALLAH, séngaq kuase Deside beléq, kaji pade benyanyi memuji keperkasean Deside.