Read KITAB SUCI ZABUR INJIL ZABUR 22 Bible Online

ZABUR 22 - KITAB SUCI ZABUR INJIL bible

ZABUR 22

¹Umaq pemimpin kor. Menurut lagu: Mayung léq waktu parek menah. Zabur Daud.

² Allah kaji, ya Allah kaji, kembéq Deside bilin kaji? Kaji bekuih, laguq Deside tetep jaoq dait nénten nulung kaji.

³Ya Allah kaji, kaji bekuih léq waktu tengari, laguq Deside tetep meneng. Kaji bedo'e léq waktu kelem, atén kaji éndah nénten tenang.

⁴Laguq Deside Raje Saq Mahesuci, saq tepuji-puji siq Israel.

⁵Leluhur kaji pade beharep léq Deside, ie pade beharep, dait Deside nyelametang ie pade.

⁶Ie pade bekuih tipaq Deside dait teluputang; ie pade beharep dait nénten tekecéweang.

⁷Laguq kaji niki longe, nénten manusie, tewade dait tehine siq dengan luwéq.

⁸ Selapuq saq serioq kaji ngoloq kaji, ie pade bekemiq dait ngintek.

⁹ Basen ie pade, “Alur ie ngandelang ALLAH, adéq ALLAH nyelametang ie, lamun ALLAH seneng kance ie!”

¹⁰Deside saq nyugulang kaji léman tian inaq kaji, dait miaq kaji aman léq iwean inaq kaji.

¹¹Mulai léman teanakang, nasib kaji araq léq gading Deside, mulai léman tian inaq kaji, Deside Allah kaji.

¹²Sampunang jaoq, séngaq bahaye sampun rapet, dait nénten araq saq nulung.

¹³Maraq banténg saq luwéq, musuh keriwung kaji, maraq banténg gamang léman Basan ie pade ngepung kaji.

¹⁴Ie pade ngadepin kaji siq biwih saq ngangaq maraq singe saq ngaum dait nyakrah.

¹⁵Balung kaji bis maraq aiq saq tumpah, selapuq tolang kaji lepas léman sendine, atén kaji léléh maraq lilin.

¹⁶Kekuatan kaji gero maraq belaqan kace, élaq kaji nekét léq langit-langit biwih kaji. Deside bilin kaji léq atas kerepuk, ya ALLAH, maraq dengan saq sampun maté.

¹⁷Kaji tekepung siq dengan-dengan jahat; maraq acong saq luwéq keriwung kaji, nusuk ime dait naén kaji.

¹⁸Selapuq tolang kaji tao kaji rékéng, musuh merhatiang kaji jari pantoan.

¹⁹ Ie pade bagi-bagiang kelambi kaji, dait miaq undian jari mauq jubah kaji.

²⁰Laguq Deside, sampunang jaoq, ya ALLAH, gelis rauh nulung kaji, séngaq Deside kekuatan kaji.

²¹Luputang nyawen kaji léman kléwang, selametang kaji léman cakrahan acong.

²²Kaji lemah, lepasang kaji léman tanggéq banténg dait léman biwih singe.

²³ Peséngan Deside gen kaji nyatayang ojok semeton-semeton kaji; dait memuji-muji Deside léq tengaq-tengaq jemaah.

²⁴Pade puji Ie, hai dengan saq takut léq ALLAH! Agungang Ie, selapuq keturunan Yakub! Sujut léq Ie, selapuq keturunan Israel!

²⁵Séngaq Ie nénten nganggep hine dengan saq tetindes, dait nénten ngeréméhang kesengsareanne. Ie nénten bebalik léman dengan nike, laguq mirengang lamun ie nunas tulung léq Ie.

²⁶Léq tengaq-tengaq jemaah kaji memuji-muji Deside, lantaran selapuq saq sampun Deside laksaneang. Léq julun ie pade saq takut léq Deside kaji ngaturang kurban saq kaji janjiqang.

²⁷Dengan miskin gen bekelor jangke besuh; dengan saq parek tipaq ALLAH gen memuji Ie. Semoge side sejahtere selaéq-laéqne!

²⁸Selapuq bangse gen inget tipaq ALLAH dait tulak ojok Ie, selapuq suku bangse gen sujut nyembah Ie.

²⁹Séngaq ALLAH saq bekuase, Ie mréntah bangse-bangse.

³⁰Selapuq dengan sombong gen sujut léq arepan-Ne, selapuq manusie saq ndéq tao jagaq idupne gen sujut nyembah Ie.

³¹Anak baine gen bebakti léq Ie, dait ie pade gen beriteang mengenai Junjungan Saq Mulie turun-temurun.

³²Tipaq bangse saq mudian teanakang gen teberiteang bahwe Ie sampun nyelametang umat-Ne.