Read KITAB SUCI ZABUR INJIL ZABUR 25 Bible Online

ZABUR 25 - KITAB SUCI ZABUR INJIL bible

ZABUR 25

¹Zabur Daud. Tipaq Deside, ya ALLAH, kaji sampéang do'e kaji,

²ya Allah kaji, kaji percaye léq Deside! Sampunang menengang kaji teperilaq, dait tesurak siq musuh-musuh kaji.

³Dengan saq behianat léq Deside gen teperilaq, laguq saq percaye léq Deside nénten gen tekecéweang.

⁴Nyatayang tipaq kaji pekayunan Deside, ya ALLAH, nyatayang napi saq harus kaji laksaneang.

⁵Ajah dait bimbing kaji adéq kaji idup menurut pekayunan Deside, séngaq Deside Allah saq nyelametang kaji, kaji tetep beharep léq Deside.

⁶Iling léq kesolahan dait kasih Deside, ya ALLAH, saq Deside nyatayang léman jaman laéq.

⁷Ampunin dose dait kesalaqan kaji léq waktu kaji masih bajang, iling léq kaji sesuai kance kasih dait kesolahan Deside.

⁸Séngaq ALLAH solah dait adil, Ie petitoqang langan tipaq dengan saq sesat.

⁹ALLAH bimbing dengan saq rendah até, dait ngajahang pekayunan-Ne léq ie pade.

¹⁰Dengan saq taat léq perjanjian dait hukum-Ne, Ie perlakuang siq kasih dait setie.

¹¹Ya ALLAH, ampunin kaji sesuai kance janji Deside, séngaq kesalaqan kaji beléq.

¹²ALLAH nyatayang tipaq dengan saq takut léq Ie langan saq harus ie pade piléq.

¹³Ie pade gen tetep idup makmur, anak bai ie pade gen ngewarisin tanaq pusake.

¹⁴ALLAH nike sahabat dengan saq takut léq Ie, Ie nyatayang maksut-Ne léq ie pade.

¹⁵Maten tiang tetep tetujuang ojok ALLAH, séngaq Ie nyelametang tiang léman bahaye.

¹⁶Perhatiang kaji, dait periakang kaji, séngaq kaji kesepian dait sengsare.

¹⁷Kesusahan atén kaji sayan beromboq bébasang kaji léman kesulitan kaji.

¹⁸Perhatiang sengsare dait kesulitan kaji, dait ampunin selapuq dose kaji.

¹⁹Cingakin luwéq gati musuh kaji; ie pade meriq gati léq kaji.

²⁰Jagaq dait selametang kaji, adéq kaji nénten ilaq, séngaq kaji berlindung léq Deside.

²¹Semoge kesolahan dait kejujuran ngawal kaji, séngaq kaji beharep léq Deside.

²²Ya Allah, bébasang dengan Israel léman selapuq kesulitanne.