Read KITAB SUCI ZABUR INJIL ZABUR 26 Bible Online

ZABUR 26 - KITAB SUCI ZABUR INJIL bible

ZABUR 26

¹Zabur Daud. Icanin keadilan tipaq kaji, ya ALLAH, séngaq kaji idup siq até saq tulus. Kaji beharep léq ALLAH, dait sekediq juaq nénten ragu.

²Uji kaji, ya ALLAH, dait cobe kaji, selidik batin dait atén kaji.

³Kaji tetep inget léq kasih Deside, dait tetep setie léq Deside.

⁴Kaji nénten suke bekumpul kance penipu, atao bebatur kance dengan munapik.

⁵Kaji meriq kumpulan dengan saq jahat, dengan-dengan jahat kaji jaoqin.

⁶Kaji bisoq imen kaji tande nénten salaq, dait lampaq ngiterin méje taoq kurban Deside, ya ALLAH,

⁷sambil nyanyiang lagu syukur, dait beriteang perbuatan Deside saq ajaip.

⁸Kaji suke Gedéng Deside, ya ALLAH, taoq Deside meneng siq penoq keagungan.

⁹Sampunang nyematéq kaji bareng kance dengan bedose, atao ngembot nyawe kaji bareng kance tukang nyematéq.

¹⁰Ie pade terus-terusan gawéq jahat, dait tetep siep nerimaq sogoqan.

¹¹Laguq kaji idup siq tulus até, periakang dait bébasang kaji.

¹²Tiang aman léman selapuq bahaye, tiang gen memuji ALLAH léq dalem jemaah.