Read KITAB SUCI ZABUR INJIL ZABUR 27 Bible Online

ZABUR 27 - KITAB SUCI ZABUR INJIL bible

ZABUR 27

¹Zabur Daud. ALLAH nike cahaye tiang dait keselametan tiang, ndéq araq saq tiang takutang. ALLAH nike bénténg perlindungan tiang, sai saq gen tiang takutang.

²Lamun tiang teserang siq penjahat saq mélé nyematéq tiang, ie pade saq kedampes dait geriq.

³Timaq tiang tekepung siq pasukan saq luweq, tiang ndéq gen takut. Timaq araq perang ngelawan tiang, tiang tetep beharep.

⁴Sopoq hal saq sampun tiang tunas léq ALLAH, cume nike saq tiang melétang: Ndot léq Gedéng ALLAH seumur idup tiang, jari ngeraseang kesolahan ALLAH dait nunas bimbingan-Ne.

⁵ALLAH ngelindungin tiang sewaktu kebucuq; Ie seboq tiang léq dalem Gedéng-Ne, dait ngangkat tiang ojok atas gunung batu.

⁶Mangkin tiang menang léman musuh léq sekelining tiang; make siq surakan cemoh tiang ngaturang kurban syukur léq Gedéng ALLAH; tiang mélé benyanyi dait memuji ALLAH.

⁷Ya ALLAH, pirengang kaji lamun kaji bekuih tipaq Deside, periakang kaji dait jawab kaji!

⁸Deside bemanik, “Dateng sembah Tiang.” Kaji bejawab, “Kaji aru parek, ya ALLAH ;

⁹sampunang nyeboq léman kaji.” Sampunang murke dait nolaq hambe Deside, séngaq Deside saq sampun nulung kaji. Sampunang tetéh atao bilin kaji, ya Allah, penyelamet kaji.

¹⁰Timaq kaji tebilin siq inaq amaq kaji, ALLAH gen meliharaq kaji.

¹¹Nyatayang tipaq kaji pekayunan Deside, ya ALLAH, bimbing kaji léq langan saq lomboq, séngaq musuh kaji luwéq gati.

¹²Sampunang nyerahang kaji tipaq napsu musuh kaji, saq nyerang kaji siq duste dait anceman.

¹³Tiang yakin gen ngalamin kesolahan ALLAH dalem idup tiang dunie niki.

¹⁴Pade beharep léq ALLAH, kuatang dait teguqang aténde; pade beharep léq ALLAH!