Read KITAB SUCI ZABUR INJIL ZABUR 28 Bible Online

ZABUR 28 - KITAB SUCI ZABUR INJIL bible

ZABUR 28

¹Zabur Daud. Ya ALLAH, tipaq Deside kaji bekuih, Deside pembéle kaji, pirengang kuihan kaji. Lamun Deside nénten kayun jawab kaji, kaji maraq dengan saq turun ojok loang kubur.

²Pirengang petunasan kaji lamun kaji bekuih nunas tulung, dait ngangkat imen kaji andang Gedéng Deside saq suci.

³Sampunang gadingang kaji bareng kance dengan durhake, bareng dengan saq gawéq kejahatan. Ie pade gerasaq ngeraos, laguq até ie pade penoq siq hal saq lengé.

⁴ Hukum ie pade lantaran perbuatan ie pade, lantaran kejahatan saq ie pade piaq. Hukum ie pade sesuai kance perbuatan ie pade; icanin ie pade hukuman saq setimpal.

⁵Ie pade nénten peduli perbuatan ALLAH, atao napi saq Ie piaq. Make Ie gen ngukum ie pade, dait binaseang ie pade selaéq-laéqne.

⁶Pade puji ALLAH, séngaq Ie sampun pirengang petunasan tiang.

⁷ALLAH pelindung dait pembéle tiang, tiang percaye léq Ie. Ie nulung dait nyenengang angen tiang, tiang memuji Ie siq lagu syukur.

⁸ALLAH ngicanin kekuatan tipaq umat-Ne, Ie béle dait nyelametang raje piléqan-Ne.

⁹Selametang umat Deside, ya ALLAH, icanin berkah dengan-dengan saq jari dowén Deside. Deside jari maraq pengarat ie pade, dait jagaq ie pade selaéq-laéqne.