Read KITAB SUCI ZABUR INJIL ZABUR 30 Bible Online

ZABUR 30 - KITAB SUCI ZABUR INJIL bible

ZABUR 30

¹Zabur Daud. Nyanyian jari peresmian Gedéng ALLAH.

²Kaji memuji Deside, ya ALLAH, séngaq Deside sampun nyelametang kaji dait nénten menengang musuh kaji nyurakin kaji.

³ALLAH Tuhan kaji, kaji bekuih tipaq Deside nunas tulung, dait Deside nyelahang kaji.

⁴Deside luputang kaji léman alam maut, dait ngidupang kaji léman tengaq-tengaq dengan-dengan maté.

⁵Pade nyanyiang puji-pujian bagi ALLAH, hai umat-Ne saq setie, dait pade besyukur tipaq Saq Mahesuci.

⁶Séngaq murke ALLAH seberaq doang, kesolahan-Ne seumur idup. Léq kekelem tiang nangis, laguq parek menah jauq sukecite.

⁷Sewaktu merase aman, kaji ngeraos maraq niki, “Kaji nénten gen tekalahang!”

⁸Séngaq Deside murah até léq kaji, ya ALLAH, Deside jariang kaji maraq gunung saq kuat. Laguq sesampun nike Deside nyeboq léman kaji, dait kaji jari takut.

⁹Tipaq Deside, ya ALLAH, kaji bekuih, léq ALLAH kaji nunas,

¹⁰“Napi manpaatne léq Deside lamun kaji maté dait turun ojok loang kubur? Napi iniq dengan maté memuji Deside dait nyeriteang kesetiean Deside?

¹¹Ya ALLAH, pirengang, dait periakang kaji. Tulung kaji, ya ALLAH!”

¹²Tangisan kaji sampun Deside salin jari igelan saq gembire, Deside bait kesedihan kaji dait Deside penoqang kaji siq sukecite.

¹³Make kaji nénten suke tedoq doang; kaji nyanyiang pujian bagi Deside, ya ALLAH Tuhan kaji, dait besyukur léq Deside selaéq-laéqne!