Read KITAB SUCI ZABUR INJIL ZABUR 31 Bible Online

ZABUR 31 - KITAB SUCI ZABUR INJIL bible

ZABUR 31

¹Umaq pemimpin kor. Zabur Daud.

²Kaji berlindung léq Deside ya ALLAH, sampunang menengang kaji tekecéweang. Selametang kaji demi keadilan Deside

³pirengang kaji dait gelis bébasang kaji. Deside maraq gunung batu kaji taoq kaji berlindung, maraq bénténg saq kuat, léq derike kaji selamet.

⁴Deside maraq gunung batu kaji dait bénténg kaji saq kuat! Bimbing kaji sesuai kance janji Deside.

⁵Lepasang kaji léman set saq tepasang jari bau kaji, séngaq Deside taoq kaji berlindung.

⁶ Léq dalem gading Deside kaji serahang nyawen kaji; Deside bébasang kaji, ya ALLAH, Tuhan saq setie.

⁷Deside meriq léq dengan saq nyembah berhale; laguq kaji percaye léq ALLAH.

⁸Kaji gen seneng dait besukecite séngaq Deside tetep ngasihin kaji. Deside cingakin penderitean kaji dait merhatiang kesusahan kaji.

⁹Deside nénten menengang kaji tetahen siq musuh, laguq miaq kaji bau lampaq bébas.

¹⁰Periakang kaji, ya ALLAH, séngaq kaji dalem kesusahan; maten kaji peréq lantaran nangis, jiwe dait awak kaji sengsare.

¹¹Idup kaji bis dalem penderitean, taun-taun kaji, kaji alamin léq dalem keluh kesah. Kekuatan kaji sayan kurang lantaran kejahatan kaji, malahan tolang-tolang kaji jari lumah.

¹²Kaji jari keréréqan musuh-musuh kaji, malahan pare tetangge kaji. Selapuq kenalan kaji tinjot lamun serioq kaji, ie pade pelai lamun bedait kance kaji léq langan.

¹³Kaji telupaqang maraq dengan maté, dait jari maraq barang saq tetetéh.

¹⁴Léq mbé-mbé araq ketakutan saq beléq; kaji dengah musuh kaji bepéséq-péséq. Ie pade besekongkol ngelawan kaji, dait miaq rencane jari nyematéq kaji.

¹⁵Laguq kaji beharep léq Deside, ya ALLAH, séngaq Deside Allah kaji.

¹⁶Deside tetep meliharaq kaji; selametang kaji léman musuh-musuh kaji, dait léman dengan-dengan saq maléq kaji.

¹⁷Semoge Deside suke léq hambe Deside; selametang kaji lantaran kasih Deside.

¹⁸Sampunang menengang kaji mauq ilaq, ya ALLAH, séngaq kaji bekuih tipaq Deside. Menengang dengan jahat teperilaq, dait tedoq-tedoq turun ojok dunie dengan maté.

¹⁹Sumpel biwih pare penduste saq siq sombongne ngoloq dengan jujur.

²⁰Berembé limpahne kesolahan Deside saq Deside sedieang umaq dengan saq takut léq Deside! Sebilang dengan serioq kesolahan saq Deside piaq, bagi ie pade saq berlindung léq Deside.

²¹Deside seboq ie pade léq dalem perlindungan Deside léman siasat dengan jahat; Deside jagaq ie pade léq dalem perlindungan Deside léman tuduhan musuh.

²²Pade puji ALLAH! Ajaip gati kasih-Ne léq tiang, waktu tiang tekepung dait teserang.

²³Léq waktu tiang bingung, tiang paran ALLAH sampun netéh tiang léman hadirat-Ne. Laguq Ie sampun mirengang petunasan tiang waktu tiang bekuih tipaq Ie.

²⁴Pade kasihin ALLAH, hai selapuq umat-Ne, ALLAH ngelindungin dengan saq setie. Laguq nénten tanggung-tanggung Ie ngukum dengan saq sombong.

²⁵Kuatang dait teguqang aténde, side selapuq saq beharep léq ALLAH!