Read KITAB SUCI ZABUR INJIL ZABUR 32 Bible Online

ZABUR 32 - KITAB SUCI ZABUR INJIL bible

ZABUR 32

¹ Zabur Daud. Nyanyian pengajahan. Bahagie dengan saq dosene teampunin, dait kesalaqanne temaapang.

²Bahagie dengan saq kejahatanne ndéq tetuntut siq ALLAH, dait saq ndéq demen nipu.

³Sengonéq kaji nénten ngaku dose kaji, sengonéq nike kaji sengsare séngaq kaji ngeluh sejelo-jeloan.

⁴Kenjelo kekelem gading Deside ngenjek kaji, ya ALLAH, balung kaji bis maraq tesedot siq panas jelo.

⁵ Beterus kaji ngaku dose kaji léq Deside, kesalaqan kaji nénten araq saq kaji seboq. Kaji mutusang gen ngaku léq Deside, dait Deside ngampunin selapuq dose kaji.

⁶Keranaq nike sebilang dengan saq soléh harus bedo'e sewaktu ngalamin kesusahan, sehingge lamun kesusahan dateng maraq belabur, ie nénten tetimpe.

⁷Deside taoq kaji nyeboq, Deside bébasang kaji léman kesulitan. Make kaji besurak cemoh séngaq Deside sampun nyelametang kaji.

⁸Manik ALLAH, “Tiang gen metitoqang langan saq harus side liwatin, side gen Tiang bimbing dait Tiang béng naséhat.

⁹Ndaq maraq jaran saq ndéq bedowé akal, saq harus tepelébék adéqne nurut.”

¹⁰Dengan bedose tetimpe luwéq sengsare; laguq dengan saq beharep léq ALLAH tetep telindungin siq kasih-Ne.

¹¹Hai dengan-dengan soléh, pade gembire dait besukecite lantaran napi saq sampun tepiaq siq ALLAH. Pade nyurak cemoh, hai selapuq dengan saq tulus aténe!