Read KITAB SUCI ZABUR INJIL ZABUR 33 Bible Online

ZABUR 33 - KITAB SUCI ZABUR INJIL bible

ZABUR 33

¹Hai dengan-dengan soléh, pade nyurak cemoh lantaran napi saq sampun tepiaq siq ALLAH ; séngaq dengan jujur patut memuji-muji.

²Besyukur tipaq ALLAH kadu kecapi, benyanyi bagi Ie kadu iringan musik.

³Nyanyiang lagu baru bagi ALLAH, puniqang kecapi bagus-bagus dait besurak-surakan siq gembire!

⁴Séngaq manik ALLAH nike kenaq; Ie setie léq dalem selapuq perbuatan-Ne.

⁵Ie seneng léq kejujuran dait keadilan; seantéro gumi penoq siq kasih-Ne.

⁶ALLAH bemanik, make langit tecipte; jelo, bulan dait bintang tecipteang siq manik-Ne.

⁷Ie ngumpulang aiq segare maraq léq dalem sopoq embung, Ie noloq segare saq galuh léq dalem sopoq takaq.

⁸Menengang seantéro gumi takut léq ALLAH dait penduduk dunie hormatin Ie.

⁹Séngaq Ie bemanik, terus selapuqne tecipte; Ie ngicanin préntah, make selapuqne araq.

¹⁰ALLAH ngancurang rencane bangse-bangse, Ie apus niat ie pade.

¹¹Laguq rencane ALLAH tetep selaéq-laéqne rancangan-Ne tetep sebelo jaman.

¹²Bahagie bangse saq ngaku ALLAH jari Tuhanne, bahagie umat saq Ie piléq jari dowé-Ne!

¹³Léman sorge ALLAH merhatiang ojok bawaq, dait Ie cingakin selapuq umat manusie.

¹⁴Léman tahte-Ne ALLAH merhatiang selapuq saq ndot léq gumi.

¹⁵Ie saq miaq até ie pade, dait wikan selapuq perbuatan ie pade.

¹⁶Raje nénten menang lantaran luwéq jumlah prajuritne, prajurit ndéqne selamet lantaran kekuatanne.

¹⁷Jaran ndéq bau teandelang jari mauq kemenangan, balungne saq beléq ndéqne bau nyelametang.

¹⁸ALLAH jagaq dengan-dengan saq takut léq Ie saq beharep léq kasih-Ne.

¹⁹Ie nyelametang ie pade léman maut, dait meliharaq idup ie pade léq waktu kelapahan.

²⁰Make ite beharep léq ALLAH, Ie penulung dait pembélente.

²¹Ite besukecite lantaran Ie dait percaye léq peséngan-Ne saq suci.

²²Semoge kaji pade tetep Deside kasihin, ya ALLAH, séngaq kaji pade beharep léq Deside.