Read KITAB SUCI ZABUR INJIL ZABUR 34 Bible Online

ZABUR 34 - KITAB SUCI ZABUR INJIL bible

ZABUR 34

¹ Zabur Daud, sewaktu ie puraq-puraq nénten waras pikiranne léq arepan Abimelek, sehingge ie tetundung beterus lumbar.

²Tiang gen besyukur tipaq ALLAH sebilang waktu, dait ndéq engkah-engkahne memuji Ie.

³Tiang gen beseneng-seneng lantaran perbuatan ALLAH ; semoge dengan tetindes dedengah dait gembire.

⁴Mulieang ALLAH bareng tiang, silaq bareng-bareng mulieang peséngan-Ne.

⁵Tiang bedo'e tipaq ALLAH, dait Ie bejawab, dait ngelepasang tiang léman selapuq ketakutan.

⁶Dengan tetindes gen beharep léq Ie dait cemoh, ie pade nénten bedowé alasan jari ilaq.

⁷Dengan saq tetindes niki bekuih, dait ALLAH mirengang, ie tebébasang léman selapuq kesusahanne.

⁸Malaékat ALLAH jagaq dengan saq takut léq ALLAH, dait bébasang ie pade léman bahaye.

⁹ Idap dait serioq mésaq berembé solahne ALLAH, bahagie dengan saq berlindung léq Ie.

¹⁰Pade takut léq ALLAH, hai side umat-Ne, séngaq dengan saq takut léq ALLAH ndéq gen kekurangan.

¹¹Singe-singe éndah lapah séngaq kurang kakenan; laguq dengan saq nyembah ALLAH ndéq kekurangan.

¹²Dengahang, hai kanak-kanak selapuq, tiang ngajah side hormatin ALLAH.

¹³ Napi side melét bélo umur dait nikmatin saq solah?

¹⁴Ndaq nyugulang ucapan-ucapan jahat, dait ndaq demen léq tipu muslihat.

¹⁵Jaoqang saq jahat, laksaneang saq solah, boyaq dait usaheang jari mauq perdaméan.

¹⁶ALLAH merhatiang dengan soléh, Ie mirengang lamun ie pade bekuih nunas tulung.

¹⁷Laguq dengan saq gawéq jahat Ie tentang; lamun ie pade maté, ie pade becat telupaqang.

¹⁸Lamun dengan soléh bekuih, ALLAH mirengang, dait nyelametang ie pade léman selapuq kesusahan.

¹⁹ALLAH rapet kance dengan saq polak angenne; Ie nyelametang dengan saq telang semangetne.

²⁰Luwéq gati penderitean dengan saq solah, laguq ALLAH bébasang ie léman selapuqne.

²¹ Awakne tetep tejagaq siq ALLAH, ndéq araq sopoq juaq tolangne saq tepolakang.

²²Dengan jahat gen maté lantaran kejahatanne, dengan saq meriq léq dengan soléh gen tehukum.

²³ALLAH nyelametang hambe-hambe-Ne; saq berlindung léq Ie ndég gen tehukum.