Read KITAB SUCI ZABUR INJIL ZABUR 35 Bible Online

ZABUR 35 - KITAB SUCI ZABUR INJIL bible

ZABUR 35

¹Zabur Daud. Ya ALLAH, lawan dengan saq ngelawan kaji, perang kance dengan saq mélé perang lawan kaji.

²Bait utar-utar dait éndé Deside, dait bangkit nulung kaji.

³Angkat kandik dait tumbak Deside jari ngelawan dengan saq maléq kaji. Manikang léq kaji bahwe Deside penyelamet kaji.

⁴Menengang dengan saq mélé nyematéq kaji tekalahang dait teperilaq. Menengang dengan saq bekomplot ngelawan kaji mundur siq bingungne.

⁵Menengang ie pade tepaléq siq Malaékat ALLAH, maraq gambas saq tekesurang siq angin.

⁶Menengang ie pade tepaléq siq Malaékat ALLAH, léq langan saq peteng dait lolat.

⁷Percume ie pade masangang kaji perangkep atao ngeduk longkak jari bau kaji.

⁸Menengang ie pade tetimpe kebinasean saq selung-selung dateng. Menengang ie pade tame léq perangkepne mésaq terus geriq dait binase.

⁹Make kaji besurak-surak lantaran ALLAH, angen kaji cemoh, séngaq Ie nyelametang kaji.

¹⁰Siq sepenoq angen kaji matur, “ALLAH, Deside nénten araq bandinganne! Deside lepasang saq lemah léman saq kuat, saq miskin dait sengsare léman saq nindes ie.”

¹¹Saksi-saksi saq jahat bangkit ngelawan kaji, dait nuduh kaji gawéq hal-hal saq nénten kaji taoq.

¹²Kesolahan kaji ie pade bales siq kejahatan; kaji araq léq dalem keadaan saq putus ase gati.

¹³Léq waktu ie pade sakit, kaji sedih dait puase; kaji bedo'e pacu-pacu,

¹⁴maraq do'eang sopoq semeton atao sopoq sahabat karib. Kaji nunduk tangisin ie pade, maraq kaji bedukecite lantaran inaq kaji mésaq.

¹⁵Laguq waktu kaji susah, ie pade seneng, dait bekeriwung ngelawan kaji. Ie pade lampaq bedinjat-dinjat jari menghine kaji.

¹⁶Ie pade terus ngoloq-oloq, dait merhatiang kaji siq meriqne.

¹⁷Jangke piran, ya Junjungan Saq Mulie, jangke piran Deside cume nyereminang doang? Selametang kaji léman serangan ie pade, luputang nyawe kaji léman singe-singe nike.

¹⁸Make kaji gen besyukur léq Deside léq tengaq-tengaq umat Deside, dait memuji peséngan Deside léq dalem kumpulan dengan luwéq.

¹⁹ Sampunang menengang kaji tejoraq siq dengan saq nénten bedowé alasan meriq léq kaji. Sampunang menengang kaji tesurakin siq dengan saq nénten bedowé alasan napi-napi meriq léq kaji.

²⁰Raos ie pade nénten gerasaq; ie pade ngerencaneang gen nipu tipaq dengan saq idup rukun.

²¹Ie pade bekuih-kuih léq kaji dait bebase bahwe ie pade sampun serioq perbuatan kaji.

²²Laguq Deside, ya ALLAH, sampun cingakin ie; sampunang meneng, ya Junjungan kaji Saq Mulie, sampunang jaoq léman kaji.

²³Silaq bangkit béle pelekare kaji, ya Allah kaji dait Junjungan kaji, tulung kaji!

²⁴Béle kaji, séngaq Deside adil, ya ALLAH Tuhan kaji, sampunang menengang musuh nyurakin kaji.

²⁵Sampunang menengang ie pade bebase léq dalem angenne, “Syukur, ite sampun binaseang ie. Napi saq ite melétang sampun tekabulang!”

²⁶Menengang dengan saq demen serioq sengsare kaji jari bingung dait mauq ilaq. Menengang dengan saq nyombongang diriq léq kaji tehine dait teperilaq.

²⁷Semoge dengan saq melét serioq kaji tejariang kenaq, besurak dait cemoh. Semoge ie pade beulang-ulang bebase, “Tetu-tetu agung ALLAH nike! Ie kayun nyelametang hambe-Ne!”

²⁸Make kaji gen beriteang keadilan Deside, dait memuji sejeloan.