Read KITAB SUCI ZABUR INJIL ZABUR 36 Bible Online

ZABUR 36 - KITAB SUCI ZABUR INJIL bible

ZABUR 36

¹Umaq pemimpin kor. Léman Daud, hambe ALLAH.

² Dose ngeraos léq atén dengan jahat, saq paling dalem, rase takut léq Allah tetu-tetu ndéq araq léq dengan nike.

³Ie ngajum diriqne, jangke kesalaqanne tedait siq dengan, dait meriq léq ie.

⁴Ucapan-ucapanne jahat dait penoq siq tipu muslihat, ie ndéq malik gawéq saq solah dait bijaksane.

⁵Léq petindoqanne ie ngerencaneang kejahatan; perbuatanne ndéq araq saq solah, saq jahat ndéq ie tolaq.

⁶Ya ALLAH, kasih Deside atasne maraq langit, dait kesetiean Deside jangke dateng awan.

⁷Kesolahan Deside tinggang maraq gunung, dait keadilan Deside dalem maraq segare saq galuh; manusie dait héwan Deside peliharaq, ya ALLAH.

⁸Tetu-tetu beraji, kasih Deside, ya Allah, manusie berlindung léq bawaq keléték Deside.

⁹Ie pade puas siq keloran saq limpah léq Gedéng Deside, siq ineman léman kokoq Deside saq nyegerang.

¹⁰Deside sumber idup selapuq mahluk, léq dalem terang Deside, kaji pade serioq terang.

¹¹Semoge Deside tetep ngasihin dengan saq kenal kance Deside, dait adil tipaq dengan saq tulus até.

¹²Sampunang menengang kaji teserang siq dengan sombong, atao tetundung siq dengan jahat.

¹³Cingakin, dengan saq gawéq kejahatan sampun geriq, ie pade tetimplak dait ndéq iniq ures malik.