Read KITAB SUCI ZABUR INJIL ZABUR 37 Bible Online

ZABUR 37 - KITAB SUCI ZABUR INJIL bible

ZABUR 37

¹Léman Daud. Ndaq sili lantaran dengan jahat, ndaq talon até léq dengan saq gawéq salaq.

²Séngaq ie pade becat telang maraq pupaq, dait layu maraq tetaletan saq ijo.

³Pade percaye léq ALLAH, dait gawéq saq solah, ndot léq negeri nike dait pade setie.

⁴Boyaq kebahagieande léq ALLAH, Ie gen ngicanin side napi saq jari keméléq aténde.

⁵Serahang idupde léq ALLAH, percaye léq Ie, Ie gen nulung side.

⁶Ie gen nyatayang kesetieande maraq jelo, dait ketulusande maraq terang léq waktu tengari.

⁷Pade antos ALLAH siq até saq tenang, dait sabar ngantos Ie. Ndaq sili lantaran dengan saq berhasil idupne, atao saq gawéq tipu muslihat.

⁸Ndaq sili dait gedek, nike cume datengang celake.

⁹Séngaq dengan saq gawéq jahat gen temusnahang, laguq saq beharep léq ALLAH gen ngewarisin negeri.

¹⁰Dengan jahat gen becat musnah, lamun teboyaq, ie sampun ndéq araq.

¹¹ Dengan saq rendah até gen ngewarisin negeri, dait nikmatin kemakmuran saq belimpah.

¹²Dengan jahat ngerencaneang saq jahat tipaq dengan saq solah, dait meriq lamun serioq ie.

¹³Laguq Junjungan Saq Mulie ngeréréqang dengan jahat, séngaq Ie wikan bahwe penutuq dengan nike sampun rapet.

¹⁴Dengan jahat nyerét kléwang dait papahang panaqne jari nyematéq dengan miskin dait sengsare, jari nyematéq dengan saq idup solah.

¹⁵Laguq dengan jahat jaqne tegalah siq kléwangne mésaq, busur ie pade gen tepolakang.

¹⁶Barang saq sekediq saq teépéang siq dengan saq solah solahan ketimbang barang saq belimpah-limpah léq dengan jahat.

¹⁷Séngaq kuase dengan jahat gen tepolakang siq ALLAH, laguq dengan solah Ie lindungin.

¹⁸ALLAH jagaq idup dengan saq soléh, dowé pusake ie pade tetep selaéq-laéqne.

¹⁹Léq waktu kesusahan ie pade ndéq gen menderite, léq waktu kelapahan ie pade ndéq gen kekurangan.

²⁰Laguq dengan jahat gen binase, musuh ALLAH gen telang maraq kembang léq lendang pupaq, ie pade gen telang maraq pendet.

²¹Dengan jahat nyinggaq dait ndéq nulakang, laguq dengan solah ngebéng secare murah até.

²²Dengan saq teberkahin siq ALLAH gen ngewarisin negeri, laguq dengan saq Ie kutuk gen tesediq.

²³ALLAH bimbing dengan léq langan saq harus ie tempuh, Ie neguqang dengan saq idupne nyenengang Ie.

²⁴Lamun geriq, ie ndéq gen babak belur, séngaq ALLAH negel imene.

²⁵Léman tiang bajang jangke toaq, ndéq uwah tiang serioq dengan saq idupne soléh tebilin siq ALLAH, atao anak baine jari tukang pekir.

²⁶Ie tetep mesinggaqang dait ngebéng, anak-anakne jari berkah.

²⁷Bilin saq jahat, gawéq saq solah, make side gen tetep ndot léq negeri nike selaéq-laéqne.

²⁸Séngaq ALLAH suke perbuatan saq solah dait adil, dengan saq setie léq Ie nénten Ie menengang kesie-sie. Ie ngelindungin ie pade jangke selaéq-laéqne, laguq keturunan dengan jahat gen temusnahang.

²⁹Dengan soléh gen ngewarisin negeri, dait ndot léq derike selaéq-laéqne.

³⁰Dengan saq solah ngeraos secare bijaksane, ie tetep lomboq léq ucapan-ucapanne.

³¹Préntah Tuhane tesimpen léq dalem aténe, ie ndéq nyimpang léman hukum nike.

³²Dengan solah teinté siq dengan jahat saq boyaq kesempatan jari nyematéq ie.

³³Laguq ALLAH nénten nyerahang ie tipaq musuh, atao tehukum sewaktu teadilin.

³⁴Pade beharep léq ALLAH dait taat léq préntah-Ne, make Ie ngangkat side jari ngewarisin negeri; side gen serioq dengan jahat temusnahang.

³⁵Tiang sampun serioq dengan jahat saq sombong; ie maraq lolo saq seger dait akahne dalem.

³⁶Waktu tiang liwat, ie ndéq araq malik, tiang boyaq ie, laguq ndéq tiang ndait.

³⁷Perhatiang dengan saq solah dait saq tulus até; dengan saq suke damé bedowé mase depan.

³⁸Laguq dengan bedose gen tebinaseang; keturunan ie pade gen temusnahang.

³⁹ALLAH nyelametang dengan soléh, dait ngelindungin ie pade sewaktu kebucuq.

⁴⁰Ie nulung dait nyelametang ie pade, dait luputang ie pade léman dengan-dengan jahat, séngaq ie pade berlindung léq Ie.