Read KITAB SUCI ZABUR INJIL ZABUR 38 Bible Online

ZABUR 38 - KITAB SUCI ZABUR INJIL bible

ZABUR 38

¹Zabur Daud waktu ngaturang kurban peringetan.

²Ya ALLAH, sampunang ngukum kaji léq dalem kemenggahan Deside, sampunang nyiksaq kaji léq dalem murke Deside.

³Panaq Deside nembus miaq awak kaji bakat, gading Deside beridap berat ngendet kaji.

⁴Kaji sakit parah lantaran kemenggahan Deside; nénten araq saq séhat léq awak kaji lantaran dose kaji.

⁵Kaji ketelep léq dalem kesalaqan kaji saq dateng maraq belabur, dose kaji berat gati idapne.

⁶Bakat-bakat léq awak kaji benanaq dait ambune bais, lantaran kaji sampun jari bodo gati.

⁷Kaji nunduk dait bungkuk, sejeloan kaji bedukecite dait sedih.

⁸Awak kaji telih panas, nénten araq saq séhat léq awak kaji.

⁹Kaji remuk dait bis balung, kaji ngereng séngaq angen kaji susah.

¹⁰Junjungan kaji Saq Mulie, Deside wikan selapuq keméléq kaji, keluhan kaji nénten araq saq teseboq léman Deside.

¹¹Jantung kaji bentek-ntek, balung kaji telang, maten kaji sampun jari rundam.

¹²Sahabat-sahabat kaji dait batur-batur kaji sampun nyedi lantaran penyakit kaji, malahan semeton-semeton kaji sampun bilin kaji.

¹³Dengan saq melét nyematéq kaji masangang kaji set; saq melét nyelakeang kaji ngancem gen binaseang kaji.

¹⁴Laguq kaji maraq dengan kedok saq nénten dedengah, maraq dengan pakoq saq nénten ngeraos.

¹⁵Tetu, kaji maraq dengan saq nénten dedengah, dait lantaran nike kaji nénten ngelawan.

¹⁶Laguq kaji beharep léq Deside, ya ALLAH, Deside Junjungan kaji, Allah kaji, jawab kaji.

¹⁷Sampunang menengang musuh kaji demen serioq kesusahan kaji, sampunang menengang ie pade nyombongang diriqne lamun kaji bimbang.

¹⁸Kaji aroh geriq, terus-terusan kaji kesakitan.

¹⁹Kaji ngaku dose-dose kaji; angen kaji kuatir mikirang kesalaqan kaji.

²⁰Dengan-dengan saq ngemusuhin kaji luwéq dait kuat, ndéq araq alasan ie pade meriq serioq kaji.

²¹Dengan saq bales kesolahan siq kejahatan musuhin kaji, séngaq kaji gawéq saq solah.

²²Ya ALLAH, sampunang bilin kaji, sampunang jaoq léman kaji, ya Allah kaji.

²³Gelis rauh nulung kaji, ya Junjungan kaji Saq Mulie, penyelamet kaji.