Read KITAB SUCI ZABUR INJIL ZABUR 39 Bible Online

ZABUR 39 - KITAB SUCI ZABUR INJIL bible

ZABUR 39

¹Umaq pemimpin kor. Umaq Yedutun. Zabur Daud.

²Pikir tiang, “Tiang mélé jagaq diriq, adéq ndéq bedose siq élaq tiang. Tiang ndéq mélé ngeraos sengonéq dengan jahat masih rapet.”

³Tiang tedoq doang, sehingge ngerugiang diriq tiang mésaq. Dait penderitean tiang idapne sayan berat;

⁴tiang tekuasein siq rase kuatir saq beléq gati. Sayan tepikirang, sayan susah angen tiang; ahirne tiang matur,

⁵Ya “ALLAH, manikang piran ajal kaji adéq kaji nenaoq berembé kontéqne idup kaji.”

⁶Singket gati Deside nentuang umur kaji! Bagi Deside bélone umur kaji nénten araq artine. Tetu-tetu, manusie maraq embok doang,

⁷idupne liwat maraq lingon. Selapuq pegawéanne sie-sie doang; ie numpukang harte, laguq ndéq nenaoq sai saq gen ngengadu.

⁸Mangkin napi saq kaji antih, ya Junjungan kaji Saq Mulie? Léq Deside kaji beharep.

⁹Lepasang kaji léman selapuq dose kaji, sampunang menengang kaji jari oloqan dengan bodo.

¹⁰Kaji tedoq dait nénten ngeraos napi-napi, séngaq Deside saq didik kaji.

¹¹Bait hukuman Deside léman kaji, séngaq kaji aroh maté lantaran empukan Deside.

¹²Manusie lantaran kesalaqanne; Deside hukum dait Deside didik maraq tembréné Deside ancurang napi saq ie paran beraji. Tetu-tetu, manusie maraq embok doang.

¹³Pirengang do'e kaji ya ALLAH, perhatiang petunasan kaji; sampunang meneng lamun kaji nangis. Maraq selapuq leluhur kaji, cume seberaq doang kaji nyodoq léq Deside.

¹⁴Sampunang ganggu kaji, adéq kaji iniq seneng sekediq, sendéqman kaji lalo dait nénten araq malik.