Read KITAB SUCI ZABUR INJIL ZABUR 40 Bible Online

ZABUR 40 - KITAB SUCI ZABUR INJIL bible

ZABUR 40

¹Umaq pemimpin kor. Zabur Daud.

²Tiang sabar ngantos pertulungan ALLAH ; terus Ie merhatiang tiang dait mirengang kuihan tiang.

³Ie antuq tiang léman loang saq bahaye, léman reraok rawe-rawe. Ie noloq tiang léq atas bukit batu, sehingge langkah tiang pasti.

⁴Ie ngajah tiang nyanyiang lagu baru, lagu pujian bagi Tuhante. Luwéq dengan serioq ie dait jari takut, terus percaye léq ALLAH.

⁵Bahagie dengan saq percaye léq ALLAH, saq ndéq milu nyembah déwe-déwe, atao nunas tulung léq dengan sombong.

⁶Ya ALLAH, luwéq gati karye Deside léq kaji pade. Ya ALLAH, Tuhan kaji, Deside nénten araq bandinganne! Luwéq rencane Deside saq ajaip léq kaji pade, ndéqne mungkin teceriteang selapuqne.

⁷ Persembahan dait kurban sesajén nénten Deside suke, kurban tunuqan dait kurban pengapus dose nénten Deside tuntut. Laguq Deside sampun ngicanin kaji kentok saq bau dengah manik Deside.

⁸Beterus tiang matur, “Niki kaji, léq dalem gulungan kitab araq tetulis mengenai kaji.

⁹Kaji seneng ngelaksaneang pekayunan Deside, ya Allah, préntah Deside kaji toloq léq dalem atén kaji.”

¹⁰Kaji nyampéang keselametan léman ALLAH léq dalem jemaah saq beléq. Nénten araq tutuqne kaji nyampéang hal nike, Deside wikan selapuq nike, ya ALLAH.

¹¹Keadilan nénten kaji seboq léq dalem atén kaji, pertulungan dait kesetiean Deside tetep kaji beriteang. Léq julu jemaah saq beléq kaji nénten tedoq doang, laguq kaji nyampéang kasih dait kesetiean Deside.

¹²Ya ALLAH sampunang engkah periak léq kaji; tetep lindungin kaji siq kasih dait kesetiean Deside.

¹³Kaji tekepung siq luwéq bahle, nénten bau terékéng luwéqne. Kaji tepaléq siq dose-dose kaji jangke kaji nénten tao nyerioq. Jumlahne luwéqan léman bulu léq ulu kaji, miaq kaji putus ase.

¹⁴Ya ALLAH, selametang kaji; gelis tulung kaji, ya ALLAH!

¹⁵Menengang dengan saq melét nyematéq kaji tekalahang dait pelai kebingungan. Menengang dengan saq nyurakin kesedihan kaji tempuk mundur dait tehine.

¹⁶Menengang dengan saq ngeréréqang kaji jari tinjot dait ilaq.

¹⁷Semoge selapuq dengan saq nyembah Deside besukecite dait cemoh, dait selapuq saq demen léq keselametan léman Deside tetep bebase, “Tetu-tetu ALLAH nike agung!”

¹⁸Kaji niki miskin dait lemah, laguq Junjungan Saq Mulie merhatiang kaji. Deside penulung dait penyelamet kaji, sampunang telat, ya Allah kaji!