Read KITAB SUCI ZABUR INJIL ZABUR 42 Bible Online

ZABUR 42 - KITAB SUCI ZABUR INJIL bible

ZABUR 42

¹Umaq pemimpin kor. Nyanyian pengajahan kaum Korah.

²Maraq mayung saq melétang aiq kokoq, maraq nike jiwen kaji kangen léq Deside, ya Allah.

³Tiang kangen léq Allah saq idup, piran tiang kanggo dateng beribadah léq Gedéng-Ne?

⁴Kenjelo kekelem tiang nangis, cume aiq mate jari keloran tiang. Sejeloan musuh tiang beketuan, “Léq mbé Allah side?”

⁵Angen tiang sedih lamun inget waktu saq laéq, sewaktu tiang lampaq ojok Gedéng Allah. Bareng kance dengan luwéq saq ngaraqang perayaan. Tiang lampaq léq julun arak-arakan siq surak-surakan dait lagu pujian.

⁶Kembéq angen tiang sedih dait osah? Tiang beharep léq Allah. Make tiang gen besyukur malik léq Ie. Tipaq Allah tiang dait penyelamet tiang.

⁷Ya ALLAH léq gumi taoq kaji tetetéh niki angen kaji lebur anyong, keranaq nike kaji inget léq Deside. Jiwen kaji anyong dalem kesedihan, kaji tetimpe siq kekacoan saq dateng maraq belabur; maraq suare aiq semporonan léq Kokoq Yordan léman Gunung Hermon dait Gunung Mizar.

⁹Semoge ALLAH nyatayang kasih-Ne léq kenjelo, adéq léq kekelem tiang bau benyanyi, dait bedo'e tipaq Allah sumber idup tiang.

¹⁰Tiang matur léq Allah, pembéle tiang, “Kembéq Deside lupaqang kaji? Kembéq kaji harus tetep menderite, lantaran tetindes siq musuh-musuh kaji?”

¹¹Angen kaji lebur anyong lantaran oloqan musuh. Ie pade terus beketuan, “Léq mbé Allah side?”

¹²Kembéq angen tiang sedih dait osah? Tiang beharep léq Allah. Make tiang gen besyukur malik léq Ie, tipaq Allah tiang dait penyelamet tiang.