Read KITAB SUCI ZABUR INJIL ZABUR 44 Bible Online

ZABUR 44 - KITAB SUCI ZABUR INJIL bible

ZABUR 44

¹Umaq pemimpin kor. Zabur kaum Korah. Nyanyian pengajahan.

²Ya Allah, kaji pade sampun dengah mésaq kisah saq teceriteang siq leluhur kaji pade mengenai karye saq sampun Deside laksaneang léq jaman laéq.

³Deside mésaq saq sediq bangse-bangse adéq umat Deside ndot léq negeri ie pade. Bangse-bangse lain Deside celakeang, laguq umat Deside, Deside menengang bejari.

⁴Tanaq nike nénten ie pade rebut siq kléwang; nénten siq kekuatanne mésaq ie pade menang, laguq siq kuase dait cahaye hadirat Deside, séngaq Deside suke léq umat Deside.

⁵Deside Raje kaji dait Allah kaji, saq ngicanin kemenangan tipaq umat Deside.

⁶Siq kuase Deside kaji pade kalahang musuh kaji pade, dait naklukang dengan-dengan saq nyerang kaji pade.

⁷Séngaq kaji nénten ngandelang panaq kaji, kléwang kaji éndah nénten gen nyelametang kaji.

⁸Laguq Deside saq nyelametang kaji pade léman musuh, dait ngalahang dengan-dengan saq meriq léq kaji pade.

⁹Make kaji pade gen tetep mulieang Deside, dait nénten araq tutuqne besyukur léq Deside.

¹⁰Laguq mangkin Deside bilin kaji pade dait menengang kaji pade tekalahang. Deside nénten malik maju bareng tentere kaji pade.

¹¹Deside menengang kaji pade pelaiqang diriq léman musuh kaji pade, dait ie pade ngerampas dowé bande kaji pade.

¹²Deside menengang kaji pade tesembeléh maraq dombe, dait Deside kelin kaji pade sopoq kance saq lain léq antare bangse-bangse.

¹³Deside jual umat Deside nénten araq ajine, dait nénten mauq bati napi-napi.

¹⁴Deside jariang kaji pade oloqan tetangge-tetangge, ie pade ngoloq-oloq dait ngeréréqang kaji pade.

¹⁵Deside jariang kaji pade sindiran bangse-bangse; ie pade ngintek léq kaji pade sambil menghine kaji pade.

¹⁶Sejeloan kaji tecele, nanggung ilaq dait teperilaq,

¹⁷lantaran dengah oloqan dait penghinean léman biwih musuh dait dengan saq dendem.

¹⁸Selapuq nike sampun nimpe kaji pade timaq kaji pade nénten ngelupaqang Deside atao behianat léq perjanjian Deside kance kaji pade.

¹⁹Atén kaji pade nénten nilas Deside; préntah Deside nénten kaji pade lupaqang.

²⁰Laguq Deside bilin kaji pade léq dalem peteng; kaji pade lemah léq antare binatang buas.

²¹Seandéne tiang pade engkah nyembah Allah tiang pade, dait bedo'e tipaq déwe lain,

²²segerah Allah nénten wikan hal nike? Séngaq Ie wikanang rahasie atén tiang pade.

²³ Demi Deside kaji pade terus teancem siq maut, dait teperlakuang maraq dombe saq gen tesembeléh.

²⁴Silaq bangkit, ya Junjungan Saq Mulie! Kembéq Deside meneng? Bangkit! Sampunang nolaq kaji pade selaéq-laéqne.

²⁵Kembéq Deside nyeboq, dait ngelupaqang sengsare dait kesusahan kaji pade?

²⁶Kaji pade geriq lebur léq tanaq, tindoq léq kerepuk lantaran kalah.

²⁷Bangkit dait rauh nulung kaji pade, selametang kaji pade lantaran kasih Deside.