Read KITAB SUCI ZABUR INJIL ZABUR 45 Bible Online

ZABUR 45 - KITAB SUCI ZABUR INJIL bible

ZABUR 45

¹Umaq pemimpin kor. Zabur kaum Korah. Nyanyian kasih. Menurut lagu: Kembang bakung.

²Ucapan-ucapan saq solah sugul léman atén tiang, tiang ngaturang lagu tiang tipaq raje. Maraq ucapan sopoq pujangge saq mahir, élaq tiang siep ngucapang syair.

³Pelungguh saq paling gagah léq antare manusie, ucapan-ucapan pelungguh penoq siq hal saq solah, keranaq nike pelungguh teberkahin siq Allah selaéq-laéqne.

⁴Taliq kléwangde léq kéng, hai raje perkase, léq dalem keagungan dait kemuliean pelungguh!

⁵Maju siq gagah tipaq kejayean bejuang demi kebenaran dait keadilan; siq kekuatan pelungguh rebut kemenangan saq beléq!

⁶Panaq pelungguh saq tajep nembus jantung musuh pelungguh, bangse-bangse geriq léq bawaq cokor pelungguh.

⁷ Allah ngicanin pelungguh kuase jari mréntah, kuase pelungguh tahen selaéq-laéqne; siq adil pelungguh mréntah rakyat pelungguh.

⁸Pelungguh suke léq keadilan dait meriq saq jahat; Nike lantaranne Allah, Allah pelungguh, sampun miléq pelungguh, dait miaq pelungguh bahagiean léman raje-raje saq lainne.

⁹Kuace pelungguh sengéh siq mur, garu dait cendane; pemaén musik léq istane gading miaq pelungguh seneng.

¹⁰Léq antare dayang-dayang istane araq putri-putri raje. Léq kanan tahte nganjeng permaésuri kadu periasan léman emas tulén.

¹¹Hai Putri, pirengang ucapan-ucapan tiang, lupaqang bangse dait kaum kerabatde.

¹²Keingesande mikat angen raje, ie tuande, pade sujut léq ie.

¹³Penduduk Tirus jauqang pelungguh persembahan; dengan sugih berusahe mikat angen pelungguh.

¹⁴Putri raje tame penoq kemuliean, kelambine besulam emas.

¹⁵Siq kelambi saq bewarne-warne ie tearak ojok raje, teiring siq dedare-dedare, batur-baturne, ie pade éndah tejauq ngadep raje.

¹⁶Ie pade besurak-surak siq senengne waktu teatong tame ojok dalem istane raje!

¹⁷Pelungguh, raje tiang, gen mauq luwéq bije jari mréntah léq tahte leluhur pelungguh. Ie pade gen pelungguh jariang penguase léq seantéro gumi.

¹⁸Siq lagu niki tiang jariang pelungguh kesohor turun-temurun; bangse-bangse gen memuji pelungguh selaéq-laéqne.