Read KITAB SUCI ZABUR INJIL ZABUR 46 Bible Online

ZABUR 46 - KITAB SUCI ZABUR INJIL bible

ZABUR 46

¹Umaq pemimpin kor. Zabur kaum Korah. Menurut lagu Alamot.

²Allah nike perlindungan dait kekuatante; Ie tetep siep dait mampu nulung léq waktu susah.

³Make ite ndéq takut, timaq gumi inggur, dait gunung-gunung ketelep léq dasar segare;

⁴timaq segare ngamuk dait umbak beléq, dait bukit-bukit ngijik siq amukanne.

⁵Araq élékan kokoq saq nyenengang Kote Allah, taoq Allah Saq Maheagung meneng.

⁶Allah meneng léq derike, make kote nike nénten gen musnah; Allah gen nulung ie léq waktu tiwoq jelo.

⁷Allah begerudug, make gumi lebur anyong; bangse-bangse biur lantur, kerajaan-kerajaan runtuh.

⁸ALLAH Saq Mahekuase araq bareng ite, Allah Yakub ngelindungin ite.

⁹Silaq, serioq napi saq tepiaq siq ALLAH; tetu-tetu ajaip karye-Ne léq gumi!

¹⁰Ie engkahang perang léq seantéro dunie, busur dait tumbak Ie ancurang, Ie sedut keréte-keréte perang kadu api.

¹¹Manik-Ne, “Engkah perang; adéq pade nenaoq, Tiang niki Allah, Tiang agung léq antare bangse-bangse, agung léq seantéro gumi.”

¹²ALLAH Saq Mahekuase araq bareng ite, Allah Yakub ngelindungin ite.