Read KITAB SUCI ZABUR INJIL ZABUR 48 Bible Online

ZABUR 48 - KITAB SUCI ZABUR INJIL bible

ZABUR 48

¹Zabur kaum Korah.

²Tetu-tetu ALLAH nike agung dait sanget tepuji léq kote Tuhante, léq gunung saq suci.

³ Sion, gunung Allah saq atas gati dait solah kote Raje Agung nyenengang seantéro gumi.

⁴Allah meneng léq puri-puri-Ne, ternyate Ie mésaq jari pelindung-Ne.

⁵Serioq raje-raje bekumpul; ie pade dateng mélé nyerang.

⁶Waktu serioq gunung nike, ie pade bengaq; ie pade tinjot dait pelai kebingungan.

⁷Léq derike ie pade ngijik ketakutan dait kesakitan, maraq dengan nine saq gen nganak,

⁸maraq kapal saq remuk léq tengaq angin pusut.

⁹Maraq saq ite dengah, mangkin ite serioq, léq Kote ALLAH Saq Mahekuase. Kote nike kote Tuhante, Ie jari pembélene selaéq-laéqne.

¹⁰Léq dalem Gedéng Deside kaji pade inget kasih Deside, ya Allah.

¹¹Peséngan Deside kesohor dait tepuji léq seantéro gumi, Deside mréntah secare adil.

¹²Menengang rakyat Sion dait Yehuda besurak siq cemohne, lantaran Deside ngukum musuh ie pade.

¹³Pade keliningin Sion, kiterin ie, dait rékéng pire luwéq menarene.

¹⁴Perhatiang tembokne, periksaq bénténgne, adéq side bau nyeriteang ojok keturunande:

¹⁵“Ie nike Allah, Allahte selaéq-laéqne, Ie gen mimpin ite jangke selaéq-laéqne.”