Read KITAB SUCI ZABUR INJIL ZABUR 49 Bible Online

ZABUR 49 - KITAB SUCI ZABUR INJIL bible

ZABUR 49

¹Umaq pemimpin kor. Zabur kaum Korah.

²Pade dengahang, hai selapuq bangse, pade bukaq kentok, hai penduduk dunie,

³dengan sederhane, atao dengan saq tehormat, dengan miskin, atao dengan saq sugih.

⁴Tiang gen ngucapang ucapan-ucapan bijaksane, dait napi saq tiang pikirang nike dalem gati pengertianne.

⁵Tiang gen merhatiang sesenggak, dait jelasang artine sambil puniq kecapi.

⁶Tiang ndéq takut sewaktu kebucuq, waktu tiang tekepung siq musuh saq jahat.

⁷Ie pade ngandelang kesugihanne, dait nyombongang dowé bandene.

⁸Setetune ndéq araq sopoq dengan juaq saq bau nyelametang semetonne, atao bayah tebusanne tipaq Allah.

⁹Napi juaq saq teaturang ndéqne bau cukup; mahel gati aji tebusan nyawene,

¹⁰adéq ie luput léman kematéan dait mauq idup selaéq-laéqne.

¹¹Tetu, ie gen serioq: Bahwe dengan bijaksane éndah ninggal. Dengan bongoh dait bodo pade-pade binase, dait ngadéqang dowéne umaq dengan lain.

¹²Ie pade gen ndot léq kuburan selaéq-laéqne; nike taoq ie pade ndot, timaq laéq ie pade bedowé luwéq tanaq.

¹³Manusie ndéq iniq idup terus léq dalem keméwahan; maraq binatang, ie éndah gen binase.

¹⁴Maraq nike nasib dengan saq ngandelang diriqne, dait mase depan dengan saq puas siq ucapanne.

¹⁵Maraq dombe, ie pade tetentuang jari maté; maut gen jari pengarat ie pade. Kelémaq-lémaq ie pade tekalahang siq dengan jujur; awak ie pade becat jari berek léq dunie dengan maté, jaoq léman balé saq méwah.

¹⁶Laguq Allah gen bébasang tiang, Ie gen ngelepasang tiang léman kuase maut.

¹⁷Ndaq takut lamun dengan jari sugih, dait kehormatan keluargene sayan beromboq.

¹⁸Séngaq waktu ninggal ie ndéq gen jauq napi-napi, dowéne ndéq gen turun ojok kubur bareng ie.

¹⁹Malahan lamun sopoq dengan bahagie waktu ie idup, dait teajum-ajum lantaran keberhasilanne,

²⁰ie gen milu éndah kance leluhurne ojok taoq saq peteng selaéq-laéqne.

²¹Manusie ndéq gen bau terus idup léq dalem keméwahan, maraq binatang, ie éndah gen binase.