Read KITAB SUCI ZABUR INJIL ZABUR 5 Bible Online

ZABUR 5 - KITAB SUCI ZABUR INJIL bible

ZABUR 5

¹Umaq pemimpin kor. Kadu suling. Zabur Daud.

²Ya ALLAH, pirengang ucapan-ucapan kaji, perhatiang keluhan kaji.

³Perhatiang kuihan kaji dait tulung kaji, ya Raje kaji dait Allah kaji.

⁴Séngaq tipaq Deside kaji bedo'e, ya ALLAH, pirengang kuihan kaji léq waktu kelémaq. Kelémaq-lémaq kaji jauq persembahan kaji dait kaji antos jawaban Deside, ya ALLAH.

⁵Deside Allah saq nénten suke léq kejahatan; dengan jahat nénten kanggo nyodoq léq Deside.

⁶Deside nénten tahen cingakin dengan sombong, Deside meriq dengan saq gawéq jahat.

⁷Deside binaseang dengan-dengan saq girang beduste, penipu dait tukang nyematéq Deside nénten suke.

⁸Laguq lantaran kasih Deside saq beléq, kaji bau tame ojok Gedéng Deside. Kaji sujut andang Gedéng Deside saq suci, dait kaji sembah Deside siq rase takut dait hormat.

⁹Ya ALLAH, luwéq gati musuh kaji! Bimbing kaji léq dalem keadilan Deside, dait nyatayang léq kaji langan Deside saq harus kaji liwatin.

¹⁰ Lantaran raos musuh kaji nénten bau tepercaye; até ie pade penoq siq rencane jahat. Ucapan-ucapan ie pade manis mikat dengan, laguq batin ie pade penoq hal-hal saq lengé.

¹¹Hukum ie pade, ya Allah kaji, menengang ie pade celake lantaran rencanene mésaq. Sediq ie pade lantaran luwéq gati dose ie pade, séngaq ie pade sampun ngelawan Deside.

¹²Semoge selapuq dengan saq berlindung léq Deside pade gembire dait besurak-surak selaéq-laéqne. Lindungin dengan-dengan saq ngasihin Deside, adéq ie pade besukecite lantaran Deside.

¹³Séngaq Deside ngicanin berkah dengan saq setie léq Deside, ya ALLAH, Deside lindungin ie pade siq kasih Deside.