Read KITAB SUCI ZABUR INJIL ZABUR 50 Bible Online

ZABUR 50 - KITAB SUCI ZABUR INJIL bible

ZABUR 50

¹Zabur Asap. TUHAN, ALLAH Saq Mahekuase, bemanik; Ie bekuih tipaq seantéro gumi léman Timuq jangke dateng Bat.

²Léman Sion, kote saq paling bagus, Allah rauh becahaye.

³Tuhante rauh dait nénten meneng doang, Ie tesenjuluq siq api saq begelaur-laur, dait tekeliningin siq ujan angin saq beléq.

⁴Ie ngemanikang langit dait gumi jari nyaksiang Ie ngadilin umat-Ne.

⁵Manik-Ne, “Pade kumpulang selapuq umat Tiang saq sampun miaq perjanjian kance Tiang, dait saq sampun Tiang sahang kadu kurban saq tesembeléh.”

⁶Langit nyeriteang bahwe Allah ngadilin umat-Ne, dait Ie mésaq jari hakimne.

⁷“Pade dengahang, umat Tiang, Tiang gen bemanik, Israel, Tiang gen besaksi tipaq side; Tiang niki Allah, Allah side.

⁸Ndéq lantaran kurbande Tiang nuduh side; kurban tunuqan side tetep araq léq julun Tiang.

⁹Tiang ndéq merluang sampi léman barénde, atao bémbéq léman ternak saq side épéang;

¹⁰séngaq selapuq binatang léq gawah nike dowén Tiang, dait beiyu-iyu binatang léq pegunungan.

¹¹Selapuq kedit léq pegunungan dowén Tiang éndah, dait selapuq mahluk saq idup léq tanaq lendang saq galuh.

¹²Lamun Tiang lapah, ndéq perlu Tiang badaq side, séngaq gumi dait selapuq isine dowén Tiang.

¹³Tiang ndéq ngelorang empaq sampi mame, ndéq éndah nginem daraq bémbéq mame.

¹⁴Pade aturang kurban syukur tipaq Allah, bayah sesangi side tipaq Saq Maheagung.

¹⁵Pade bekuih tipaq Tiang léq waktu kebucuq, Tiang gen bébasang side, dait side gen mulieang Tiang.”

¹⁶Laguq tipaq dengan jahat Allah bemanik, “Side ndéq bedowé hak ngucapang hukum Tiang, dait ngeraos mengenai perjanjian Tiang.

¹⁷Séngaq side ndéq mélé nerimaq peringetan Tiang, dait nolaq manik Tiang.

¹⁸Lamun side serioq sopoq maling, side milu kance ie, dait side bebatur kance dengan-dengan saq demen bezinah.

¹⁹Side tetep ngeraosang saq jahat, dait tetep siep siq tipu muslihat.

²⁰Side terus pitnah semetonde, dait sumpaq senaq semeton kuninde.

²¹Nike saq side laksaneang, laguq Tiang tedoq doang, jari side pikir Tiang maraq side. Laguq mangkin Tiang wade side, dait selapuq nike Tiang jariang nyate léq side.

²²Pade perhatiang, side saq lupaq léq Allah; jagaq ndaq jangke side Tiang binaseang, dait ndéq araq saq nyelametang.

²³Dengan saq ngaturang persembahan syukur sebagé kurbanne, ie saq hormatin Tiang; dait tipaq dengan saq lomboq pengelampanne gen Tiang petitoqang keselametan léman Tiang.”