Read KITAB SUCI ZABUR INJIL ZABUR 51 Bible Online

ZABUR 51 - KITAB SUCI ZABUR INJIL bible

ZABUR 51

¹Umaq pemimpin kor. Zabur saq tekarang siq Daud

² sesampun ie teperinget siq Nabi Natan lantaran bezinah kance Batsyeba.

³Periakang kaji ya Allah, séngaq Deside tetep ngasihin kaji, apus dose kaji lantaran belas kasih Deside saq beléq.

⁴Persiq selapuq kejahatan kaji; persiq kaji léman dose kaji.

⁵Séngaq kaji ngaku kesalaqan-kesalaqan kaji, dose kaji tetep kaji inget-inget.

⁶ Léq Deside, léq Deside doang kaji bedose, dait kaji laksaneang napi saq Deside anggep jahat. Make sepatutne Deside ngukum kaji, adil keputusan Deside.

⁷Setetune, kaji jahat léman kaji teanakang, dait bedose léman kaji tepetianang.

⁸Deside nuntut ketulusan até; penoqin batin kaji siq hikmat Deside.

⁹Suciang kaji, make kaji gen bersi; bisoq kaji, make kaji gen putéqan tebanding kapas.

¹⁰Menengang kaji dengah kabar sukecite, adéq até saq Deside remukang niki besurak malik.

¹¹Sampunang sereminang dose-dose kaji, dait apus selapuq kesalaqan kaji.

¹²Piaq até kaji murni, ya Allah, jariang batin kaji baru siq semanget saq tabah.

¹³Sampunang netéh kaji léman arepan Deside, dait sampunang bait Roh Deside saq suci léman kaji.

¹⁴Piaq kaji seneng malik lantaran keselametan léman Deside, icanin kaji até saq réde jari taat léq Deside.

¹⁵Make kaji gen ngajahang préntah Deside tipaq dengan bedose, adéq ie pade tulak ojok Deside.

¹⁶Luputang kaji léman maut, ya Allah, Allah penyelamet kaji, make siq cemoh gen kaji beriteang keadilan Deside.

¹⁷Ya Junjungan kaji Saq Mulie, tulung kaji ngeraos, make kaji gen memuji-muji Deside.

¹⁸Deside nénten suke léq kurban sembeléhan; lamun kaji ngaturang kurban tunuqan, Deside nénten suke léq hal nike.

¹⁹Kurban bagi Allah nike até saq lebur anyong, até saq remuk dait betobat nénten Deside tolaq.

²⁰Ya Allah, nyatayang kesolahan Deside tipaq Sion, sesuai kance kerédean Deside, silaq penganjeng malik tembok-tembok Yerusalem.

²¹Make Deside gen suke nerimaq kurban saq patut, kurban tunuqan dait kurban saq kotong selapuqne sampi mame saq tekurbanang léq atas méje taoq kurban Deside.