Read KITAB SUCI ZABUR INJIL ZABUR 55 Bible Online

ZABUR 55 - KITAB SUCI ZABUR INJIL bible

ZABUR 55

¹Umaq pemimpin kor. Kadu iringan kecapi. Nyanyian pengajahan Daud.

²Ya Allah, pirengang do'e kaji, sampunang bebalik léman petunasan kaji.

³Perhatiang kaji dait jawab kaji, kaji ancur lantaran kesusahan kaji.

⁴Angen kaji osah siq anceman musuh dait penindesan dengan jahat. Séngaq ie pade nyusahang idup kaji, dait siq gedekne musuhin kaji.

⁵Angen kaji osah gati, rase takut saq beléq tipaq maut miaq kaji takut.

⁶Kaji tekuasein siq rase takut dait leger, tepenoqin siq perasaan saq nakutang.

⁷Pikir kaji, “Seandéne kaji bedowé keléték maraq dare, kaji gen kesur boyaq taoq saq tenang.

⁸Tetu, kaji gen kesur jaoq gati, dait ndot léq padang gurun.

⁹Kaji gen becat-becat boyaq taoq bebao léman ujan angin dait angin pusut.

¹⁰Ya Junjungan kaji Saq Mulie, piaq musuh-musuh kaji bingung, oreang napi saq ie pade raosang, séngaq kaji serioq kekerasan dait pegejuhan léq kote.

¹¹Kenjelo kekelem ie pade begelining, piaq kejahatan dait nimbulang oregade.

¹²Léq mbé-mbé araq pengancuran; penindesan dait penipuan nénten araq tutuq-tutuqne léq peken.

¹³Seandéne musuh saq ngewade tiang, tiang masih bau tahen. Lamun musuh saq menghine tiang, tiang masih bau nyeboq léman ie.

¹⁴Laguq malahan, batur tiang, sahabat tiang, dengan saq tiang percaye, saq behianat léq tiang.

¹⁵Laéq tiang pade bebatur solah, dait biase beribadah bareng-bareng léq Gedéng Allah.

¹⁶Alurang musuh tiang maté dadakan dait turun idup-idup ojok dunie dengan maté, séngaq kejahatan araq léq balé ie pade, léq tengaq-tengaq ie pade.

¹⁷Laguq tiang bekuih tipaq Allah, ALLAH gen nyelametang tiang.

¹⁸Kenjelo kekelem tiang ngeluh dait nangis, dait Ie mirengang suare tiang.

¹⁹Ie nyelametang tiang léman serangan musuh, saq luwéq gati ngelawan tiang.

²⁰Allah saq mréntah léman selaéq-laéqne gen mirengang tiang dait ngalahang ie pade. Séngaq ie pade ndéq mélé betobat, dait ndéq takut tipaq Allah.

²¹Onos batur tiang nyerang batur-baturne, ie tilas janjine.

²²Ucapan-ucapanne manis léq luwah doang, laguq dalem angenne penoq siq meriq. Raosne lemah lembut, laguq nusuk maraq kléwang saq merang.

²³Serahang kuatirde ojok ALLAH, make Ie gen nulung side; séngaq dengan jujur nénten Ie menengang tekalahang.

²⁴Laguq Deside, ya Allah, gen namaqang ie pade ojok dalem loang saq paling dalem. Pare penipu dait tukang nyematéq nénten gen bau jangke separo umur ie pade. Laguq kaji percaye léq Deside.