Read KITAB SUCI ZABUR INJIL ZABUR 56 Bible Online

ZABUR 56 - KITAB SUCI ZABUR INJIL bible

ZABUR 56

¹ Umaq pemimpin kor. Menurut lagu: Kedit dare saq pakoq, léman daérah saq jaoq. Zabur Daud sewaktu ie tebau siq dengan Pilistin léq Gat.

²Periakang kaji, ya Allah, séngaq kaji teserang, terus-terusan kaji tetindes siq musuh-musuh kaji.

³Sejeloan kaji teicaq-icaq siq musuh kaji, araq luwéq dengan saq musuhin kaji, ya Allah Saq Maheagung.

⁴Waktu kaji takut, kaji beharep léq Deside.

⁵Tiang memuji Allah lantaran manik-Ne; tiang percaye léq Allah, make tiang ndéq takut, napi saq bau tepiaq siq manusie léq tiang.

⁶Sejeloan musuh oreang pelekare kaji, terus-terusan ie pade berusahe nyelakeang kaji.

⁷Ie pade begerombol sambil nyeboq, nginté selapuq saq tiang gawéq, dait boyaq kesempatan jari nyematéq kaji.

⁸Napi ie pade bau luput siq kejahatan ie pade? Binaseang ie pade léq dalem kemenggahan Deside, ya Allah!

⁹Deside rékéng kesengsarean kaji, dait wikan luwéqne aiq maté kaji; napi Deside nénten rékéng hal nike?

¹⁰Léq waktu tiang bekuih nunas tulung, musuh gen mundur, séngaq tiang nenaoq Allah araq léq pihak tiang.

¹¹Tiang memuji Allah lantaran manik-Ne, tiang memuji ALLAH lantaran manik-Ne.

¹²Tiang percaye léq Ie, make tiang ndéq takut, napi saq bau tepiaq siq manusie léq tiang?

¹³Kaji gen nepatin janji kaji tipaq Deside, ya Allah, dait ngaturang kurban syukur tipaq Deside.

¹⁴Séngaq Deside luputang kaji léman maut, Deside jagaq kaji adéq nénten geriq. Make kaji kanggo idup léq dalem perlindungan Allah, dalem cahaye saq nerangin selapuq saq idup.