Read KITAB SUCI ZABUR INJIL ZABUR 57 Bible Online

ZABUR 57 - KITAB SUCI ZABUR INJIL bible

ZABUR 57

¹ Umaq pemimpin kor. Menurut lagu: Sampunang musnahang. Zabur léman Daud, sewaktu ie pelai ojok dalem goe adéqne jaoq léman Saul.

²Periakang kaji, ya Allah, periakang kaji, séngaq léq Deside kaji berlindung. Léq bawaq keléték Deside kaji berlindung, jangke ujan angin saq ngamuk nike engkah.

³Tiang bekuih tipaq Allah Saq Maheagung, tipaq Allah saq nyeleséang pelekare tiang nike.

⁴Léman sorge Ie bejawab dait nyelametang tiang; Ie kalahang dengan-dengan saq nindes tiang. Allah gen nyatayang bahwe Ie setie léq tiang, dait tetep ngasihin tiang.

⁵Tiang tekepung siq musuh, ie pade maraq singe saq ngaken manusie. Gigi ie pade maraq tumbak dait panaq, élaq ie pade maraq kléwang saq merang.

⁶Ya Allah, nyatayang keagungan Deside léq langit, dait kemuliean Deside léq seantéro gumi.

⁷Tiang tepasangang set siq musuh tiang, dait molakang semanget tiang. Ie pade kaliq longkak léq langan tiang, laguq ie mésaq geriq ojok dalemne.

⁸Atén kaji siep, ya Allah, atén tiang siep; tiang mélé benyanyi dait memuji Deside.

⁹Silaq ures, hai jiwen tiang! Ures hai gambus dait kecapi! Tiang mélé nguresang jelo saq gen tiwoq.

¹⁰Junjungan Saq Mulie, tiang mélé besyukur léq Deside léq antare bangse-bangse. Kaji melét nyanyiang pujian bagi Deside léq antare umat manusie.

¹¹Séngaq kasih Deside beléq jangke dateng langit, dait kesetiean Deside jangke dateng awan.

¹²Ya Allah, nyatayang keagungan Deside léq langit, dait kemuliean Deside léq seantéro gumi.