Read KITAB SUCI ZABUR INJIL ZABUR 62 Bible Online

ZABUR 62 - KITAB SUCI ZABUR INJIL bible

ZABUR 62

¹Umaq pemimpin kor. Menurut: Yedutun. Zabur Daud.

²Cume dékét Allah doang tiang tenang, léman Ie doang keselametan tiang.

³Cume Ie saq ngelindungin dait nyelametang tiang, Ie pembéle tiang, tiang ndéq gen bimbang.

⁴Jangke piran side selapuq mélé nyerang sopoq dengan saq sampun maraq tembok saq dénggéq dait tembok saq gen ruk?

⁵Side cume beniat geriqang ie léman kedudukanne saq atas. Side demen beduste; siq biwihde side ngucapang berkah, laguq léq dalem aténde ngutuk.

⁶Cume léq Allah doang tiang tenang, léman Ie doang keselametan tiang.

⁷Cume Ie saq ngelindungin dait nyelametang tiang; Ie pembéle tiang, tiang ndéq gen bimbang.

⁸Ie Allah saq ngicanin tiang keselametan dait kehormatan, Ie pelindung tiang dait pembéle tiang saq kuat.

⁹Hai bangse tiang, pade beharep tipaq Allah sebilang waktu; sampéang isi aténde léq Ie, séngaq Ie taoq ite berlindung.

¹⁰Manusie cume maraq sekali berembok doang, beléq kodéq pade-pade ndéq beraji. Lamun tetimbang, ternyate ie pade déang, déangan léman sekali berembok.

¹¹Ndaq harepang hasil pemeresan, dait ndaq ngandelang barang rampasan. Malahan lamun kesugihande beromboq, ndaq ie doang lain angende.

¹²Sekali Allah bemanik, due hal saq tiang dengah: Bahwe kuase asalne léman Ie,

¹³ dait léman Ie éndah asalne kasih dait setie. Ya Junjungan Saq Mulie, Deside bales sebilang dengan menurut perbuatanne.