Read KITAB SUCI ZABUR INJIL ZABUR 64 Bible Online

ZABUR 64 - KITAB SUCI ZABUR INJIL bible

ZABUR 64

¹Umaq pemimpin kor. Zabur Daud.

²Ya Allah, pirengang do'e kaji sewaktu kaji susah, selametang nyawe kaji léman musuh saq nakutang.

³Lindungin kaji léman komplotan dengan durhake, léman rencane licik dengan-dengan jahat.

⁴Ie pade piaq élaq ie pade merang maraq kléwang, dait nyugulang ucapan-ucapan saq kejem maraq panaq.

⁵Léman taoq ie pade nyeboq ie pade nyebarang cerite duste, ie pade nénten takut pitnah dengan saq nénten salaq.

⁶Ie pade tetep teguq léq niatne saq jahat, dait berunding mélé masang perangkep; ie pade paran nénten araq saq serioq.

⁷Ie pade ngerencaneang kejahatan, dait bebase, “Tiang pade miaq rencane saq licik gati.” Até dait batin manusie dalem gati, nénten bau tepahamin.

⁸Laguq Allah ngelecatang panaq-Ne ojok ie pade, dait selung-selung ie pade bakat.

⁹Ie pade binase lantaran ucapan ie pade; selapuq saq serioq ie ngintek.

¹⁰Beterus selapuq dengan gen jari takut; ie pade mikirang perbuatan Allah dait beriteang napi saq sampun Ie laksaneang.

¹¹Make selapuq dengan solah gen cemoh lantaran napi saq tepiaq siq ALLAH. Ie pade gen berlindung léq ALLAH; selapuq dengan jujur gen bangge.