Read KITAB SUCI ZABUR INJIL ZABUR 65 Bible Online

ZABUR 65 - KITAB SUCI ZABUR INJIL bible

ZABUR 65

¹Umaq pemimpin kor. Zabur Daud. Nyanyian.

²Kaji pade patut memuji Deside léq Sion, ya Allah dait bayah sesangi kaji pade léq Deside.

³Séngaq Deside saq ngabulang do'e; selapuq dengan parek ojok Deside séngaq sampun bedose.

⁴Dose-dose kaji berat gati léq kaji, laguq Deside ngampunin selapuqne.

⁵Bahagie dengan saq Deside piléq, dait Deside manikang jari ndot léq Gedéng Deside. Kaji pade gen tepuasang siq selapuq saq solah léq Gedéng Deside, taoq Deside meneng saq suci.

⁶Deside jawab kaji pade siq ngicanin kaji pade kemenangan, Deside piaq hal-hal ajaip jari nyelametang kaji pade! Deside harepan selapuq bangse jangke dateng segare saq jaoq.

⁷Siq kekuatan Deside, Deside anjengang gunung-gunung, jari nyatayang kuase Deside saq perkase.

⁸Deside engkahang umbak saq ngamuk dait saq beléq gati suarene, dait Deside piaq tenang keributan léq tengaq bangse-bangse.

⁹Selapuq penduduk gumi takut dait hormat serioq karye-karye Deside saq hébat. Seantéro gumi Deside piaq besurak cemoh.

¹⁰Tanaq nike Deside peliharaq dait Deside turunang ujan, Deside jariang subur jangke hasilne belimpah-limpah. Kokoq-kokoq Deside penoqang siq aiq, Deside sedieang ie pade gandum, tetu, maraq nike Deside nyedieang ie.

¹¹Deside peraiq tanaq onos tenggaleanne dait Deside basaqang bungkulan-bungkulan tanaqne. Deside bélékang tanaqne siq ujan, dait Deside jamin bahwe suli-suline gen tiwoq subur.

¹²Lantaran kesolahan Deside, sebilang taun Deside sedieang hasil tanaq; léq mbé Deside rauh, léq derike araq hasil saq berlimpah-limpah.

¹³Padang gurun penoq siq bémbéq dait dombe, selapuq bukitne besukecite.

¹⁴Lendang-lendang pupaq besimbut siq dombe, tembéréng-tembéréng gunung penoq siq gandum. Selapuqne besurak dait benyanyi siq cemohne.