Read KITAB SUCI ZABUR INJIL ZABUR 66 Bible Online

ZABUR 66 - KITAB SUCI ZABUR INJIL bible

ZABUR 66

¹Umaq pemimpin kor. Sopoq nyanyian. Pade besurak-surak bagi Allah, hai seantéro gumi!

²Pade benyanyi dait agungang peséngan-Ne, mulieang Ie siq puji-pujian.

³Ucapang tipaq Allah, “Tetu-tetu miaq takjub perbuatan Deside! Musuh takluk léq Deside siq rase takut, séngaq beléq gati kuase Deside.

⁴Seantéro gumi sujut nyembah Deside, ie pade benyanyi memuji peséngan Deside.”

⁵Pade dateng dait pade serioq perbuatan Allah, tetu-tetu miaq takjub karye-karye-Ne léq antare manusie!

⁶ Segare Ie robah jari tanaq gero, leluhur tiang pade lampaq mbelat segare nike. Make tiang pade cemoh lantaran perbuatan-Ne.

⁷Ie mréntah siq perkase selaéq-laéqne. Ie ngawasin bangse-bangse, adéq dengan saq gen ngelawan ndéq bau sombong léq Ie.

⁸Pade puji Allah tiang pade, hai bangse-bangse, nyanyiang keras-keras pujiande tipaq Ie!

⁹Ie sampun jagaq tiang pade adéq tetep idup, dait nénten menengang tiang pade geriq.

¹⁰Ya Allah, Deside sampun nguji kaji pade maraq dengan saq murniang perak léq dalem api.

¹¹Deside menengang kaji pade geriq ojok dalem perangkep, dait Deside icanin bandean saq berat gati.

¹²Deside menengang kaji pade teicaq-icaq siq musuh; kaji pade liwatin belabur dait api. Laguq mangkin Deside sampun gadingang kaji pade ojok taoq saq makmur.

¹³Kaji gen jauq kurban tunuqan ojok Gedéng Deside dait bayah sesangi kaji léq Deside,

¹⁴saq kaji ucapang waktu kaji susah.

¹⁵Kaji ngaturang persembahan léq Deside kurban tunuqan léman binatang piléqan, bémbéq dombe dait sampi mame, pendetne taék jangke dateng langit.

¹⁶Silaq dateng dait dengah, hai selapuq dengan saq takut léq Allah, gen tiang ceriteang napi saq telaksaneang siq Allah léq tiang.

¹⁷Tiang sampun bekuih nunas tulung léq Ie; mangkin tiang nyanyiang Ie pujian.

¹⁸Seandéne tiang demen mikirang kejahatan, pasti Junjungan Saq Mulie nénten kayun mirengang.

¹⁹Laguq Allah sampun mirengang tiang, Ie merhatiang petunasan tiang.

²⁰Tiang memuji Allah séngaq Ie nénten nolaq do'e tiang, dait tetep ngasihin tiang.