Read KITAB SUCI ZABUR INJIL ZABUR 68 Bible Online

ZABUR 68 - KITAB SUCI ZABUR INJIL bible

ZABUR 68

¹Umaq pemimpin kor. Zabur Daud.

²Allah bangkit, make musuh-musuh-Ne buyar, dengan saq meriq léq Ie pelai léman arepan-Ne.

³Allah sediq ie pade, maraq pendet saq tetiup terus telang. Maraq lilin léléh léq dalem api, maraq nike dengan jahat binase léq arepan Allah.

⁴Laguq dengan soléh besukecite dait cemoh, ie pade besurak-surak siq cemohne léq arepan Allah.

⁵Pade benyanyi bagi Allah, pade puji peséngan-Ne, siepang rurung beléq umaq Ie saq melinggih léq atas awan. Peséngan-Ne ALLAH, pade beseneng-seneng léq arepan-Ne!

⁶Allah saq meneng léq Gedéng-Ne saq suci Ie jari bapaq anak yatim dait pembéle bebalu-bebalu.

⁷Allah ngicanin taoq ndot tipaq dengan saq kesepian; Ie bébasang dengan tahenan sehingge ie pade bahagie. Laguq dengan-dengan saq durhake harus ndot léq tanaq saq gero.

⁸Ya Allah, sewaktu Deside bimbing umat Deside lampaq liwatin pupaq saq gero,

⁹ gumi inggur, ujan tumpah léq arepan Deside, lantaran kerauhan Allah; malahan Sinai injok léq arepan Allah, Allah Israel.

¹⁰Deside nurunang ujan saq belimpah-limpah, dait Deside jariang gembur malik tanaq Deside saq gero.

¹¹Beterus umat Deside ndot léq derike; léq dalem kesolahan Deside, ya Allah, Deside meliharaq dengan miskin.

¹²Junjungan Saq Mulie bemanik; dengan-dengan saq jauq kabar solah nike tentere-tentere saq luwéq:

¹³“Raje-raje dait pasukanne sampun pelai!” Ie pade pelai maraq dare saq kesur. Dengan-dengan nine léq balé bagi-bagiang, perak dait emas saq tebilin. Timaq luwéq saq ndéq milu perang, umat Allah sampun mauq kemenangan.

¹⁵Sewaktu Saq Mahekuase miaq buyar raje-raje léq derike, make salju turun léman Gunung Salmon.

¹⁶Gunung Basan nike gunung saq hébat, gunung saq luwéq pucukne.

¹⁷Kembéq léman pucukde saq luwéq nike side tampe merhatiang tipaq Bukit Sion saq tepiléq siq Allah jari taoq-Ne meneng? ALLAH gen meneng léq derike selaéq-laéqne.

¹⁸Siq puluan iyu keréte saq kuat Allah rauh léq antare ie pade dalem keagungan-Ne.

¹⁹ ALLAH taék ojok taoq saq atas; Ie gadingang luwéq tawanan. Ie nerimaq persembahan léman manusie malahan léman dengan-dengan saq durhake; adéq ie pade ndot léq derike; bareng kance Tuhan ALLAH.

²⁰Pade puji Junjungan Saq Mulie, séngaq Ie Allah saq nyelametang ite; sebilang jelo Ie lémbah bandeante.

²¹Tuhante nike Ie Junjungante saq nyelametang, Ie bébasang ite léman kematéan.

²²Allah pasti gen ngeremukang ulu musuh-Ne, dengan-dengan saq terus idup léq dalem dose.

²³Manik Junjungan Saq Mulie, “Hai umat Tiang, Tiang jauq musuhde léman Basan Tiang jauq ie pade tulak léman dasar segare,

²⁴adéq side bisoq naénde siq daraq ie pade, dait acong-acongde délat sepuas-puasne.”

²⁵Selapuq serioq arak-arakan kemenangan Deside, ya Allah, arak-arakan kemenangan Allah kaji, Raje kaji, ojok Gedéng-Ne saq suci.

²⁶Léq julu lampaq penyanyi-penyanyi, léq mudi pemaén-pemaén kecapi; léq tengaq-tengaq dedare-dedare saq nabuh rebane; maraq niki nyanyian ie pade:

²⁷“Pade puji Allah léq dalem kumpulan umat-Ne, pade puji Junjungan Saq Mulie, hai selapuq keturunan Yakub!”

²⁸Benyamin, suku saq paling kodéq, lampaq léq julu, beterus bedélok-délok pemimpin-pemimpin Yehuda, léq mudine pemimpin-pemimpin Zebulon dait Naptali.

²⁹Tuhande nuntut kekuatande; ya Allah, teguqang napi saq sampun Deside piaq tipaq kaji pade.

³⁰Raje-raje jauq persembahan tipaq Deside léq Gedéng Deside léq Yerusalem.

³¹Pade semprak Mesir, binatang buas nike léq tengaq pupaq gelagah. Peringet bangse-bangse, kumpulan banténg nike dait anak-anakne, saq saling ngicaq-icaq jari mauq perak. Allah miaq buyar bangse-bangse saq demen beperang.

³²Pembeléq-pembeléq Mesir dateng jauq tembage; dengan Etiopia gupuh-gupuh jauq upeti tipaq Allah.

³³Pade benyanyi bagi Allah, hai selapuq kerajaan, pade nyanyiang puji-pujian bagi Junjungante Saq Mulie,

³⁴bagi Ie saq liwatin awang-awang jaman laéq. Dengahang! Ie bemanik, suare-Ne begerudug maraq guntur saq beléq.

³⁵Pade akuq kuase Allah; kemuliean-Ne araq léq atas Israel, kuase-Ne jangke léq langit.

³⁶Tuhante tetu-tetu miaq takjub waktu Ie sugul léman Gedéng-Ne saq suci. Allah Israel ngicanin kuase dait kekuatan léq umat-Ne. Pade puji Allah!