Read KITAB SUCI ZABUR INJIL ZABUR 69 Bible Online

ZABUR 69 - KITAB SUCI ZABUR INJIL bible

ZABUR 69

¹Umaq pemimpin kor. Menurut lagu: Kembang Bakung. Léman Daud.

²Ya Allah, selametang kaji, séngaq aiq sampun taék jangke dateng belong kaji.

³Kaji kederos ojok rawe saq dalem, nénten araq taoq kaji begenjah. Kaji ketelep léq aiq saq dalem, teéléhang siq umbak saq beléq.

⁴Kaji bekuih-kuih jangke lelah dait kerongkongan kaji gero. Maten kaji peréq ngantos pertulungan Allah kaji.

⁵ Dengan saq nénten bedowé alasan meriq léq kaji, luwéqan léman bulu léq ulu kaji. Dengan-dengan kuat mélé binaseang kaji; ie pade nyerang kaji siq pitnah. Kaji tepaksaq nulakang barang saq nénten kaji rampas.

⁶Ya Allah, Deside wikan kesalaqan-kesalaqan kaji nénten araq dose kaji saq teseboq léq arepan Deside.

⁷Sampunang menengang kaji miaq ilaq tipaq dengan-dengan saq beharep léq Deside, ya Junjungan kaji Saq Mulie, ALLAH Saq Mahekuase. Sampunang menengang kaji miaq hine tipaq dengan-dengan saq nyembah Deside, ya Allah Israel!

⁸Séngaq lantaran Deside kaji tehine, lantaran Deside kaji tewade.

⁹Kaji jari maraq dengan pendateng léq antare kadang jarin kaji, maraq dengan lain léq antare semeton kaji.

¹⁰ Kasih kaji léq Gedéng Deside, nguasein atén kaji oloq-oloqan dengan saq menghine Deside nimpe diriq kaji.

¹¹Kaji nangis dait puase laguq ie pade menghine kaji.

¹²Kaji ngengadu kéréng karung tande besengkale, laguq ie pade nyindir kaji.

¹³Kaji jari raosan léq taoq dengan bekumpul, dait tukang bowos nyanyiang lagu mengenai kaji.

¹⁴Laguq kaji bedo'e tipaq Deside, ya ALLAH, ya Allah, jawab kaji léq waktu saq solah. Tulung kaji lantaran kasih Deside saq beléq dait lantaran kesetiean Deside.

¹⁵Sampunang menengang kaji ketelep léq dalem rawe, selametang kaji léman dengan-dengan saq meriq léq kaji dait léman aiq saq dalem.

¹⁶Sampunang menengang kaji teéléhang siq umbak saq beléq, dait ketelep léq dasar segare atao tekubur léq dalem loang.

¹⁷Silaq jawab kaji, ya ALLAH, séngaq kasih dait setie Deside solah. Semoge Deside kayun bebalik tipaq kaji séngaq beléq belas kasihan Deside.

¹⁸Sampunang nyeboq léman hambe Deside niki, séngaq kaji kenyeke susah, gelis nulung kaji.

¹⁹Rauh selametang kaji, bébasang kaji léman musuh-musuh kaji.

²⁰Deside wikan berembé kaji tecele, tehine dait teperilaq, Deside cingakin selapuq musuh kaji.

²¹Penghinean sampun miaq kaji polak angen, dait kaji putus ase. Kaji boyaq belas kasihan, laguq sie-sie, kaji boyaq penghibur, laguq nénten kaji ndait.

²² Malah kaji tebéng racun jari keloran; waktu bedak, kaji tebéng aiq anggur saq pedis jari ineman.

²³ Menengang keloran saq araq léq julun ie pade miaq celake, dait jari perangkep temué-temué ie pade.

²⁴Menengang penenteng ie pade jari bute dait bongkor ie pade tetep lumah.

²⁵Tumpahang kemenggahan Deside tipaq ie pade, menengang ie pade tetimpe siq murke Deside saq ngelaur maraq api.

²⁶ Menengang perkémahan ie pade sepi mimit, dait kémah-kémah ie pade nénten araq dengan tauq.

²⁷Séngaq ie pade nganiaye dengan saq Deside hukum, dait ngeraosang dengan-dengan saq Deside siksaq.

²⁸Menengang kesalaqan ie pade sayan luwéq; sampunang miaq ie pade jari kenaq.

²⁹ Menengang aran ie pade teapus léman Kitab Kehidupan; dait nénten tecatet léq daptar dengan jujur.

³⁰Laguq kaji tetindes dait beridap sakit, angkat kaji ya Allah, dait selametang kaji.

³¹Tiang gen memuji Allah siq nyanyian, mulieang Ie siq nyanyian syukur.

³²Léq arepan ALLAH hal nike solahan ketimbang kurban sampi, kurban sampi mame saq beléq.

³³Serioq hal nike dengan saq tetindes cemoh, dengan saq nyembah Allah merase tehibur.

³⁴Séngaq ALLAH mirengang dengan saq miskin; Ie nénten ngelupaqang umat-Ne léq dalem bui.

³⁵Pade puji Allah, hai langit dait gumi, segare dait selapuq mahluk léq dalemne.

³⁶Allah gen nyelametang Yerusalem dait penganjeng malik kote-kote Yehuda. Umat-Ne gen ndot léq derike; tanaq nike jari dowén ie pade.

³⁷Anak baine gen jari pewarisne; dengan-dengan saq ngasihin Ie gen ndot léq derike.